Anası onu bəstəkar görmək arzusunda idi, lakin o, hakim peşəsini seçdi - MÜSAHİBƏ

Xanım futbol hakimi Gülnurə Əkbərzadə Sport24.az-a müsahibə verib.

- Hakimliyə gəlişiniz necə alındı?

- Lənkəranda futbol oynuyurdum. Rəhmətlik Xalid müəllim məşqçim olub. Rayonda qadın futbolu olmadığına görə məni oğlanlarla yarışlara aparardı. Həmin dönəmdə veteranlardan ibarət futzal çempionatı keçirilirdi. Kömək etmək üçün məni də özü ilə aparmışdı. Orda mənə burada qadın futbolu yoxdur, bəlkə hakim olasan? dedi. Onu da əlavə etdi ki, rayonda başla, sonra Bakıda davam edərsən. Bilirdi ki, İdman Akademiyasına daxil olmaq istəyirəm. Və başladım orda hakimlik etməyə. Təxminən ilyarım Lənkəranda hakimlik etdim. Sonra davamını Bakıda gətirdim.

- Bu qərarı ailənizdə necə qarşıladılar?

- Atam birinci Qarabağ müharibəsində şəhid olub. Onda dörd yaşım var idi.  Anam pianino dərslərini davam etdirməyimi istəyirdi.  Anam məndən yazdığı şeirləri bəstələməyimi istəyirdi. Sadəcə mənim həvəsim yox idi. İdmana gəlməyimə bir söz demədi. Ona görə qərarıma hörmətlə yanaşdı. O, mənə həmişəm dəstək olub.

- Kişilərdən ibarət komandaların oyunlarında qadın hakim olmaq necə hissdir?

- Kişi komandalarında sürət və inkişaf baxımından hakimlik etmək yaxşıdı. Kişi futbolu daha maraqlı olur.

- Özünüzə kumir hesab etdiyiniz qadın referi var?

- Xeyr. Özümə kumir hesab etdiyim hakim yoxdu.

- Hakim olmaq istəyən gənc qızlara nə məsləhət görərdiniz?

- Hakimlik çox gözəl peşədi. Marağı olan mütləq gəlsin. Sonra da tərk edə bilməyəcəklər. FİFA dərəcəli hakim olmaq daha da maraqlıdı. Ölkələr gəzirsən, yeni tanışlar, yeni dostların olur.

- Karyeranızla bağlı ən böyük hədəfiniz nədir?

- Azərbaycanda ən böyük hədəfimə çatmışam. UEFA və FİFA bayrağı altında keçirilən final oyunlarını idarə etmək istəyərdim. Çempionlar Liqasının matçına təyinat almaq ən böyük arzumdur. İnşallah, bir gün hədəfimə çataram.

Nuh Tarverdiyev