Lent.az
Amorim uğursuz mövsümə görə azarkeşlərdən üzr istəyib və gələcəkdə vəziyyətin yaxşılaşacağına söz verib.
Uzun müddət davam edən qələbəsiz seriyaya son qoyan Premyer Liqanın son turunda "Aston Villa"nı məğlub etdikdən sonra "Mançester Yunayted"in baş məşqçisi azarkeşlərə şəxsən müraciət edib.
Lent.az xarici mediaya istinadla bildirir ki, Amorim dəstəyə görə təşəkkür edib və mövsümün uğursuz keçdiyini etiraf edib.
Mütəxəssis azarkeşlərin yaşadığı məyusluğa görə üzr istəyib və növbəti mövsümdə "Mançester Yunayted"in ən yüksək hədəflər uğrunda mübarizə aparması üçün əlindən gələni edəcəyinə əmin edib.
"İlk növbədə, bu mövsüm üçün üzr istəmək istəyirəm. Bütün komanda kimi mən də həqiqətən məyus oldum. Sizə təşəkkür etmək istəyirəm. Mövsüm boyu dəstəyinizə görə çox minnətdarıq.
Bilirəm, çox çətin idi, amma indi seçim etməliyik. Keçmişdə ilişib qala bilərik - bu mövsüm artıq keçmişdə qalıb - ya da birləşib irəli gedə bilərik.
Altı ay əvvəl ilk üç oyundan - iki qələbə və heç-heçədən sonra dedim ki, fırtına gəlir. Bu gün, bu fəlakətli mövsümdən sonra sizə demək istəyirəm: yaxşı günlər yaxınlaşır.
Dünyada istənilən vəziyyətdən, istənilən fəlakətdən sağ çıxa biləcəyini artıq sübut etmiş klub varsa, o da bizim klubdur - "Mançester Yunayted".
İndi futbolçularımdan üzr istəmək istəyirəm. Bəzən haqsızlıq etdim, amma həmişə sizinlə ədalətli olmağa çalışdım.
Çox sağ olun. Növbəti mövsümə qədər!", - Amorimin müraciətində deyilir.
