Almaniya Emrelidən bəhs edir - Mahirin qərarı necə olacaq?

Mahir Emreli bir çox klubun maraq dairəsindədir. Mövsüm onun üçün kifayət qədər maraqlı keçdi: Azərbaycan millisinin hücumçusu "Nürnberq"də yaxşı məhsuldarlıqla yadda qaldı və indi yeni çağırışlara hazırdır. Əsas sual isə budur: o, karyerasını harada davam etdirəcək?

İdman.biz xəbər verir ki, Almaniyada çıxış etməsi Mahir üçün yeni üfüqlər açıb.

Almaniya futbolunun onsuz da təqdimata ehtiyacı yoxdur, 2-ci Bundesliqanın səviyyəsi də kifayət qədər yüksəkdir. Bu baxımdan "Nürnberq"ə keçidi azərbaycanlı forvard üçün doğru seçim saymaq olar. Üstəlik, komandanın baş məşqçisi əfsanəvi Miroslav Klozedir və Emreli özü də etiraf edib ki, bu mənada onun uşaqlıq arzusu reallaşıb.

Ümumilikdə mövsüm Mahir üçün asan keçmədi: yüksəlişlər də oldu, enişlər də. Amma uzun bir yolda heç kim bundan sığortalanmayıb. Əsas odur ki, o, "Nürnberq"də özünü sübut edə bildi. Azarkeşlər onu meydandakı əzmkarlığı və oyununa görə sevdilər, o isə buna qollarla cavab verdi. Mövsümün son hissəsində isə Emrelini dayandırmaq mümkün deyildi: o, "Paderborn"la qarşılaşmada iki, "Kayzerslautern" və "Fortuna" ilə oyunların hərəsində bir qol vurdu. Ən yaddaqalan məqam isə "Ayntraxt Braunşveyq"lə matçda het-trik etməsi və turun rəmzi yığmasına seçilməsi oldu.

Mahir ümumilikdə "Nürnberq"in heyətində 11 dəfə fərqlənib ki, onlardan 10-u çempionatda, 1-i isə Almaniya kubokunda olub. Komandası da mövsümü 10-cu pillədə başa vurub.

Emrelinin "Nürnberq"dən ayrılması başadüşüləndir. Kloze özü də klubun bununla bağlı qərarı çoxdan verdiyini bildirib. Üstəlik, Mahirin məhsuldarlığı fonunda onun qarşısında təklif bolluğu var. Bu təkliflərin bir qismi Almaniyadandır: xüsusilə "Kayzerslautern" və Bundesliqa təmsilçisi "Sankt Pauli" onunla maraqlanırlar. Karyerasını Almaniyada davam etdirməsi də çox real görünür: adaptasiya problemi olmayacaq, həm də onun adı indi gündəmdədir. Almaniya mətbuatı da təriflər yağdırır: "Bild" nəşri onun mövsümün sonundakı het-trikinə "Mahir sehrbaz olur" başlıqlı yazı ilə reaksiya verib.

Hərçənd Mahirin tam fərqli bir istiqaməti seçməsi də mümkündür. Amma yəqin ki, Emreli tələsməyəcək və karyerasına yeni təkan verəcək ağıllı qərar qəbul edəcək. Bu isə "Nürnberq"dən daha güclü bir komanda olmalıdır ki, Mahir öz ambisiyalarını gerçəkləşdirə bilsin. Görünən odur ki, Bundesliqa klublarından birinə keçid getdikcə daha məntiqli görünür.

Amma gəlin, qabaqcadan proqnoz verməyək və hadisələrin necə inkişaf edəcəyini gözləyək.

Zaki Feyzullayev
İdman.biz