Aleksey İsayev Azərbaycan millisindəki çıxışından danışdı

"Qarabağ"ın yarımmüdafiəçisi Aleksey İsayev Azərbaycan millisindəki çıxışının tarixçəsindən danışıb. Sport24.az xəbər verir ki, o, "Championat"a müsahibəsində "Sumqayıt"da keçirdiyi ilk ildən sonra Azərbaycan millisində oynamaq təklifi aldığını deyib.

Yarımmüdafiəçi ona bu şansı verənlərə minnətdarlığını ifadə edib: "Düzünü desəm, şübhələrim var idi. Yığmaya ilk dəfə gələndə, demək olar ki, dərhal geri qayıtdım. Fikirləşirdim ki, buna ehtiyacım var, ya yox. Mən Sibirdə böyümüşəm və Rusiya millisində oynamaq arzusunda idim. Amma mənə verdikləri şansa görə o insanlara minnətdaram. Heç vaxt düşünməzdim ki, başqa ölkənin yığmasına bu qədər həvəslə gedəcəyəm. Fəxr edirəm və xoşbəxtəm ki, bu ölkəni beynəlxalq arenada təmsil edirəm və bundan ötrü hər zaman əlimdən gələni edirəm".

Sibirdə anadan olmuş futbolçu Azərbaycanı özünə ikinci vətən hesab etdiyini vurğulayıb: "Çoxları Azərbaycan çempionatını aşağı qiymətləndirir. Burada futbolun səviyyəsi çox yaxşıdır. "Qarabağ", "Neftçi", "Sabah", "Zirə", Qurban Berdiyevin "Turan"ı çox yaxşı komandalardır. Burada səviyyəli legionerlər, istedadlı yerli uşaqlar var. Ona görə də harada daha asan olacağını düşünməmişəm. Yalnız uşaqlıq arzum – Rusiya yığmasında oynamaqla bağlı şübhələrim var idi. Düşünürdüm ki, ora düşmək şansım var".

Aleksey İsayev Krasnoyarsk futbolunun yetirməsidir, peşəkar karyerasında "Qarabağ"dan başqa, "Yenisey", "Zenit-2", "Sabah"da da oynayıb.