Idman.biz
"İslandiya yığmasına qarşı oyunu izləmişdim və komandanın çox da uğurlu çıxış etmədiyini gördüm. Bilirəm ki, Azərbaycan millisi beynəlxalq arenada bir müddətdir istədiyi nəticələri qazana bilmir, müəyyən uğursuz dövr keçirir".
Bunu İdman.biz-əaçıqlamasındaRusiya millisinin sabiq futbolçusu, azərbaycanəsilli Aleksandr Səmədov yığmamızın son oyunları barədə fikirlərini bölüşərkən deyib.
41 yaşlı mütəxəssis bildirib ki, Azərbaycan millisinin uğursuz seriyası gec-tez sona çatmalı idi və bu, Ukrayna ilə görüşdə baş verdi: "Ukrayna ilə matça baxmamışam, amma hər bir məğlubiyyət seriyası bir vaxt bitməlidir. Gördüyünüz kimi, bu dəfə də həmin seriya bu oyunda sona çatdı. Hər bir azərbaycanlı milli komandanın daha keyfiyyətli futbol sərgiləməsini və uğur qazanmasını arzulayır".
Xatırladaq ki, Azərbaycan millisi 2026-cı il dünya çempionatının seçmə mərhələsinin ilk turunda səfərdə İslandiyaya 0:5 hesabı ilə uduzub. Növbəti oyunda isə Bakıdakı qarşılaşmada Ukrayna yığması ilə 1:1 hesablı heç-heçə qeydə alınıb.
Reykyavikdəki məğlubiyyətdən sonra baş məşqçi postundan portuqaliyalı Fernandu Santuş istefaya göndərilib. Ukrayna ilə oyuna komandanı o zaman hələ gənclər yığmasının (U-21) baş məşqçisi olan Ayxan Abbasov çıxarıb. Daha sonra o, əsas yığmanın baş məşqçisi vəzifəsinə təyin edilib.
Azərbaycan millisi DÇ-2026-nın seçmə mərhələsində növbəti oyunlarını səfərdə Fransa (10 oktyabr) və Ukrayna (13 oktyabr) yığmalarına qarşı keçirəcək.
