Idman.biz
"Komandaların əvvəllər qarşılaşdığı rəqiblər səviyyəsinə görə xeyli fərqlənir. Ukrayna Fransa ilə, Azərbaycan isə İslandiya ilə oynayıb. Təbii ki, bu kollektivlər peşəkarlıq baxımından fərqlidirlər".
İdman.biz xəbər verir ki, bu sözləri AZƏRTAC-a açıqlamasında Ukrayna yığmasının və "Dinamo" (Kiyev) klubunun sabiq qapıçısı Aleksandr Rıbka DÇ-2026-nın seçmə mərhələsində ölkəsinin Azərbaycan yığması ilə keçirəcəyi oyun barədə danışarkən deyib.
O, bugünkü matçda Ukrayna yığmasının şanslı olduğunu söyləyib: "Qələbəyə əmin olduğum üçün üstünlüyü Ukraynaya verəcəyəm. Düşünürəm ki, oyun 0:2 hesabı ilə başa çatacaq".
Azərbaycan millisində baş məşqçi dəyişikliyini şərh edən Rıbka bildirib ki, bu cür dəyişikliklər həmişə yeni emosiya və fəlsəfə gətirir. "Ayxan Abbasovla işləməmişəm. Amma onu Azərbaycan klublarındakı fəaliyyətini yaxşı xatırlayıram. O, döyüşkən kollektiv qurmağı və oyunu nizamlamağı bacarır. Azərbaycan millisinin yaxşı perspektivləri var, əsas odur ki, Ukrayna ilə oyunda "yanmasınlar".
Vaxtilə "Səbail" komandasında çıxış etmiş veteran qolkiper ölkəmizdə keçirdiyi vaxtı xüsusi məhəbbətlə xatırladığını bildirib. "Mən bu ölkədə bir il yarım möhtəşəm vaxt keçirmişəm. Xalqınıza və futbolçulara böyük hörmətim var. Azərbaycan millisində "Qarabağ" və digər yerli klublarda, eləcə də xaricdə çıxış edən kifayət qədər peşəkar futbolçular toplanıb. Milli komandanız yaxşı və döyüşkən kollektivdir".
Qeyd edək ki, bu gün Tofiq Bəhramov adına Respublika Stadionunda keçiriləcək Azərbaycan – Ukrayna qarşılaşması saat 20:00-da başlayacaq.
İdman.biz
