Idman.biz
"Liverpul"un hücumçusu Aleksandr İsak, "Nyukasl"dan gedəndən sonra keçmiş məşqçisi Eddi Hou ilə danışmadığını açıqlayıb.
İdman.Biz-in məlumatına görə, ESPN-ə müsahibə verən 26 yaşlı futbolçu keçmişi arxada qoymağa və karyerasının növbəti mərhələsinə fokuslanmağa üstünlük verdiyini etiraf edib.
"Mən o hekayəyə qayıtmaq istəmirəm. Bunun mənə də, "Nyukasl"a da faydası olmayacaq. Hər şeyi olduğu kimi buraxmaq daha yaxşıdır", - İsak komandadan gedişinin şərtlərini şərh edərkən deyib.
Forvard yayda "Nyukasl"ın rəhbərliyini vədlərini yerinə yetirməməkdə günahlandıraraq "Liverpul"a keçməyə qərar verib. Ötən mövsüm o, 23 qol vurmaqla klubu Çempionlar Liqasına çıxararaq komandanın əsas oyunçusuna çevrilib. Lakin yeni mövsüm başlamazdan əvvəl o, müqavilə başa çatana qədər məşq etməkdən imtina edib.
İsak "Enfild"ə keçdikdən sonra çətinliklərlə qarşılaşıb: o, yalnız bir qol vurub, o da İngiltərə Liqa Kubokunda "Sauthempton"a qarşı. Bir dəfə də olsun 90 dəqiqəni tam oynamayıb. Buna baxmayaraq, isveçli milli komandaya çağırılıb və özünü getdikcə daha yaxşı hiss etdiyini bildirib.
"Mən çox işləyirəm, fiziki hazırlığımı yaxşılaşdırmağa çalışıram. Komanda yaxşılaşdıqda, mən də yaxşı olacağıma əminəm. "Liverpul"da əla atmosfer və azarkeşlər var. Burada olmaqdan məmnunam", - İsak vurğulayıb.
Arne Slotun rəhbərlik etdiyi "Liverpul", ardıcıl üç məğlubiyyətdən sonra qalibiyyət seriyasını bərpa etmək üçün oktyabrın 19-da "Mançester Yunated"ə qarşı oynayacaq.
