Ağasəlim Mircavadov: “Yəqin ki, Qurban müəllim bu nüansı nəzərə alıb”

"Xorvatiya futbolu Yuqoslaviya dönəmindən keyfiyyəti ilə seçilib. Orda uşaq futbolu çox inkişaf edib. Hər həyətdə, məhəllədə basketbol və futbol meydanları var. Sözüm o ki, bu ölkədə insanlar futbolla nəfəs alır. Odur ki, bu gün "Qarabağ"ı Xorvatiyada tək güclü rəqiblə mübarizə yox, həm də fanatlar tərəfindən güclü təzyiq gözləyir". Bu sözləri Sport24.az-a açıqlamasında Ağasəlim Mircavadov deyib.

Təcrübəli mütəxəssis "Dinamo"nun ağdamlıların III mərhələdə mübarizədən kənarlaşdırdığı "Ludoqoritsa"dan daha güclü komanda olduğunu vurğulayıb: "Qarabağ" artıq avrokuboklarda "bişib".  "Ludoqorets" zəfərindən sonra Qurban Qurbanovun komandasından daha da çəkinirlər. Ancaq onu qeyd edim ki, "Dinamo" Bolqarıstan təmsilçisindən də güclüdü. Amma "Qarabağ"ın da üstün cəhətləri var. Əsas odu ki, ağdamlılar oturuşmuş yaxşı heyətə malikdi. Həmçinin təmsilçimiz son oyundan sonra psixoloji yüksəlişdədi. Təbii ki, arxayınlaşmaq da olmaz. Xorvatiya təmsilçisi topla yaxşı oynayan, əlinə düşən şanslardan maksimum yararlanan, ən əsası heyətində keyfiyyətli oyunçular olan kollektivdi".

Mircavadov "Qarabağ"ın çatışmazlığını da qeyd edib: "Hazırda "Qarabağ"da itkilər olsa da, məni narahat edən əsas məqam odur ki, Qurban müəllim orta xətdə Yankoviç kimi faydalı iş əmsalı yüksək olan futbolçunun xidmətindən məhrumdu. Hazırda baş məşqçinin sərəncamında orda sahədə irəli-geri işləyə bilən cəmi bir oyunçu var. Rəqib bundan istifadə edə bilər. Yəqin ki, Qurban müəllim bu nüansı nəzərə alıb. Hamımız "Qarabağ"ın səfərdən yaxşı nəticəylə dönəcəyinə ümidliyik".

Ağasəlim bəy vaxtilə sükanı arxasında olduğu "Xəzər-Lənkəran"ın  "Dinamo" ilə oyununu da xatırlayıb: " "Xəzər-Lənkəran" həm Bakıda, həm də Zaqrebdə "Dinamo"ya qarşı layiqli mübarizə aparmışdı. Onlar bizdən çəkinirdilər. Bu gün dünya futbolunun ulduzlarından biri olan Luka Modriç həmin vaxt bizə qarşı oynayırdı. Onun 20 yaşı vardı. Evdə Zaur Ramazanovun qolu ilə heç-heçə etdik. Səfərdə də çoxlarının gözləmədiyi halda 16-cı dəqiqədə hesabı açdıq və fasiləyə üstün yollandıq. İkinci yarıda rəqib bərabərlik qolunu vursa da, yenidən rəqib qapısına yol tapdıq. Hakim əvvəlcə qolu qeydə alsa da, sonda laysman referiyə nəsə dedi nəticədə baş hakim qərarını dəyişdi. Sırf hakim qərəzinə görə qarşılaşma əlavə vaxta getdi və yekunda məğlub olduq. Təbii ki, bu matçın üzərində illər keçib. Hazırkı "Dinamo" o vaxtkı kollektivdən daha güclüdü. Biz Zaqreb təmsilçinə başağrısı olmağı bacarmışdıqsa, deməli, "Qarabağ" bunu daha yaxşı səviyyədə edə bilər".

ABDULLA İSMAYILOĞLU