Ağasəlim Mircavadov: "Qoy derbiyə gəlsinlər, biz də bilək ki, futbola həqiqətən də maraq göstərirlər"

"İnanıram ki, gərgin və maraqlı matç görəcəyik".

Bunu İdman.biz-ə futbol məşqçisi Ağasəlim Mircavadov deyib.

Təcrübəli mütəxəssis Misli Premyer Liqasının XXXI turunda baş tutacaq "Qarabağ" - "Neftçi" matçı haqqında fikirlərini bölüşüb. O bildirib ki, bu oyunda komandalar xal üçün mübarizə aparmır: "Qarabağ" artıq çempionluğu təmin edib. "Neftçi" də dördüncü yer uğrunda mübarizə aparacaq qədər güclü deyil. Hazırda onlar Azərbaycan kubokuna kökləniblər. İstənilən halda, çempionatı normal oynamaq lazımdır ki, kuboku da normal oynayasan. Nəticəyə gəldikdə, "Qarabağ" üstün olacaq. Bunun söhbəti yoxdur. Hər iki klub aprelin 23-də Azərbaycan kubokunu oynayacaqlar. Ola bilər ki, bəzi futbolçular bu matçı buraxsınlar. Ancaq istərdim ki, kimlər meydana çıxacaqsa, yaxşı oyun nümayiş etdirsinlər".

Mircavadov Azərbaycan derbisinin özünəməxsus yeri olduğunu vurğulayıb: "1992-ci ildən bu günə kimi "Qarabağ" - "Neftçi" oyunu derbi sayılır və gərgin keçir. Azarkeşlər də, məşqçilər də, futbolçular da bu matçda maraqlı olurlar. İnkişaf məhz belə oyunlarda gedir. Bu gün də maraqlı mübarizə gözləyirəm. Əsas odur ki, azarkeşlər stadiona gəlsinlər. Heç olmasa, beş-on min adam gəlsin ki, biz də görək azarkeş futbolu sevir".

O, hər iki komandanı dəstəklədiyini bildirib: "Neftçi" mənim doğma komandamdır. Orada doğulmuşam, oynamışam, işləmişəm. "Qarabağ"da çalışdığım dövrdə də maraqlı və yaddaqalan günlərimiz çox olub. Hər iki kluba uğurlar arzulayıram. Xüsusilə də Avropada".

Qeyd edək ki, bu gün Tofiq Bəhramov adına Respublika stadionunda keçiriləcək "Qarabağ" - "Neftçi" matçının start fiti saat 20:00-da səslənəcək.

Aytac Sahəd
İdman.biz