Report.az
"Olimpiakos"la oyun "Qarabağ" üçün imic baxımından vacibdir.
Bunu "Report"a açıqlamasında AFFA-nın Məşqçilər Komitəsinin üzvü Ağasəlim Mircavadov "Qarabağ"ın UEFA Avropa Liqasının Liqa mərhələsinin VIII turunda bu gün "Olimpiakos"a (Yunanıstan) qarşı keçirəcəyi matçla bağlı düşüncələrini bölüşərkən deyib.
Azərbaycan millisinin sabiq baş məşqçisi Ağdam təmsilçisinin imicini qoruması üçün axşamkı görüşdə qələbə qazanmalı olduğunu bildirib:
"Maliyyət cəhətdən "Olimpiakos"un "Qarabağ"dan üstün olduğunu unutmamalıyıq. Ümumiyyətlə rəqib komanda heç də zəif deyil. Onlar ötən il Konfrans Liqasının qalibi olublar. Bununla belə, "Olimpiakos"la oyun "Qarabağ" üçün imic baxımından vacibdir. Təmsilçimizdən qələbə gözləyirəm. Düşünmürəm ki, pley-off şansının itməsinə görə futbolçular zəif çıxış etsinlər. Çünki Avropada baş tutan hər oyun vacibdir. Qazanılacaq qələbə "Qarabağ"ı xaricdə bir qədər də tanıdacaq".
Qeyd edək ki, Avropa Liqasının Liqa mərhələsinin sonuncu - VIII turunun "Olimpiakos" - "Qarabağ" oyunu bu axşam, Bakı vaxtı ilə saat 00:00-da start götürəcək.
