Ağasəlim Mircavadov: "Futbolçularda xarakter lazımdır"

"Artıq əsas heyət müəyyənləşdirilməlidir. Oyun prinsipi, taktika təkmilləşdirilməlidir".

Bunu idman.biz-ə Ağasəlim Mircavadov Azərbaycan milli komandası barəsində danışarkən deyib.

Mütəxəssis beynəlxalq yoldaşlıq oyunu çərçivəsində Macarıstana qarşı keçiriləcək oyun öncəsi fikirlərini açıqlayıb. O bildirib ki, yığmamıza psixoloji amil, motivasiya baxımından bu gün qələbə vacibdir: "Macarıstanla görüşdə uğurlu nəticə əldə edilməlidir ki, futbolçularımız dünya çempionatının seçmə mərhələ oyunlarında inamla çıxış etsin, ruh yüksəkliyi olsun. Çempionat başa çatdıqdan sonra əksər oyunçuların fiziki vəziyyəti aşağı səviyyədə olur. Hazırda meydanda mübarizə aparmaq üçün futbolçularda xarakter lazımdır".

Mircavadov 21 yaşlılardan ibarət Azərbaycan yığmasının isə lazımı oyun praktikası olmamasını vurğulayıb: "Çempionluq uğrunda mübarizə aparan klublar gənc oyunçulara az şans verir. Bu da futbolçunun peşəkar olaraq yetişməsinə mənfi təsir göstərir. Hər zaman oyunçulara deyirəm ki, xaricə gedin, legioner həyatı yaşayın. İnkişaf ordadır. U-21-də yaxşı atmosfer var, futbolçular istəklidir. Məşqçilər korpusunda yüksək əhval-ruhiyyə, qalibiyyətə inam mövcuddur. Lakin futbolçu yığmaya klubdan gəldiyi üçün bütün bunlar yetərsiz qalır. İstənilən halda, milli səviyyəsində futbolun inkişafı üçün məşqçilər heyəti daim klublarla sıx əlaqədə olmalıdır. Oyunçular diqqət mərkəzində saxlanılmalıdır".

Qeyd edək ki, Azərbaycan - Macarıstan oyunu bu gün "Liv Bona Dea Arena"da baş tutacaq. Görüşün start fiti Bakı vaxtı ilə saat 20:00-da səslənəcək.

Murad Abdullazadə
İdman.biz