İdman.biz
Təxirə salınmış oyunlar nəzərə alınmasa, Misli Premyer Liqasında mövsümün 1/3 hissəsi arxada qalıb.
İdman.biz xəbər verir ki, 12 tur çərçivəsində baş tutan 58 matçda 14 penalti təyin olunub.
Bu zərbələrdən 10-u qolla nəticələnib. Futbolçuların 11 metrlik nöqtədən dəqiqlik faizi 71,4 faiz təşkil edir.
"Turan Tovuz" hamıdan çox – 4 penalti imkanı qazanıb. Kurban Berdıyevin komandası bu şansların yarısını qaçırıb. Elə vurulmayan penaltilərin də düz yarısı qərblilərin hesabındadır.
"Sabah" üç dəfə 11 metrlik cərimə zərbəsi yerinə yetirib. Premyer Liqanın 10 komandasından 7-si belə imkan əldə edib. Üç klub - "Neftçi", "Şamaxı" və "Sumqayıt" "ağ nöqtə"yə yaxınlaşmayıb.
Penalti vuran klublar: "Turan Tovuz" – 4 penalti (2-si qeyri-dəqiq), "Sabah" – 3 (1), "Araz-Naxçıvan", "Zirə" – 2, "Qarabağ", "Kəpəz" – 1, "Səbail" – 1 (1).
Mövsümün arxada qalan hissəsində 9 komandanın qapısına penalti təyin edilib. Beş klubun hərəsi 2, dördü isə 1 dəfə cəzalanıb. Yalnız "Araz-Naxçıvan"ın qapısına belə zərbə təyin olunmayıb.
Penalti ilə cəzalanan klublar: "Səbail", "Şamaxl" – 2, "Qarabağ", "Sumqayıt", "Kəpəz" – 2 (1), "Sabah", "Turan", "Zirə" – 1, "Neftçi" – 1 (1). Qeyd edək ki, cari çempionatda təxminən hər 4,14 oyuna və ya 373 dəqiqəyə bir penalti təyin olunub.
Vüqar Xeyrullayev
İdman.biz
