Idman.biz
Futbol məşqçisi Aftandil Hacıyevin İdman.biz-ə müsahibəsi
- "Səbail"in Misli Premyer Liqasının başa çatmasına iki tur qalmış I Liqaya düşməsi rəsmiləşdi. Vaxtilə bu klubda çalışan, bürünc medal qazanan və avrokuboka çıxaran məşqçi kimi çox güman, bu xəbər sizi də üzdü.
- Əlbəttə. "Səbail"də yaxşı günlərimiz olub. Klubun inkişafı, adının qaldırılması istiqamətində mühüm işlər görən bir çox insanın adını çəkə bilərik. Təəssüf ki, artıq komandanın Premyer Liqanı tərk etməsinə şahid olduq. Neyləmək olar, futbolda belə hallar da yaşanır. Çox istərdim ki, komanda I liqada belə olsa fəaliyyətini davam etdirsin. Vaxtilə "Səbail"də çox yaxşı işlər görmüşdük. Davamını gətirmək istəsək də, təəssüf ki, alınmadı.
- Niyə alınmadı?
- Bu tək mənimlə bağlı olan məsələ deyildi. Klubun daxilində baş verən proseslər və ümumi iş prinsiplərinin dəyişməsindən dolayı vəziyyət bu cür alındı. Sabit fəaliyyətin davam etdirilməməsi kimi səbəblər klubun aşağı diviziona yuvarlanmasına gətirib çıxardı.
- Qeyri-sabitlikdən söz düşmüşkən, baş məşqçinin tez-tez dəyişməsini klubun uğursuz nəticələrinin əsas səbəbi kimi göstərmək olar?
- Deməzdim. Bu sadəcə səbəblərdən biridir, ancaq əsas deyil. Zənnimcə, klubun idarəçilik sistemində yanlışlıqlar oldu. Klub əldən-ələ keçdi. Bu da öz növbəsində nəticələrə təsir etdi. Bir məşqçi komandanı formalaşdırırdı, digəri davam etdirdi. Belə olan halda sabit oyun nümayiş etdirib uğurlu nəticələrə imza atmaq çətin məsələdir.
- Azərbaycan çempionatında "Şamaxı" və "Qəbələ"nin 1 illik fasilədən sonra yenidən Premyer Liqaya qayıtması təcrübəsi var. Sizcə, "Səbail" də bunu bacara bilər?
- Ümid edirəm ki, komanda təkrar toparlanıb gələn mövsüm yenidən Premyer Liqaya qayıdar. Bilirik ki, Bayıl qəsəbəsi Azərbaycan futboluna Maksim Medvedev, Rauf Əliyev kimi futbolçular verib. Akademiyadan gələcəkdə yaxşı futbolçular çıxa bilər. Çox istərdim ki, Akademiyaları fəaliyyətini davam etdirsin. Ümumiyyətlə, Bayıl futbolla yaşayan qəsəbədir. Ən çox buna görə üzülürəm. Bilirəm ki, azarkeşlər də hazırda məyusdur. Onlar klublarının böyük uğurlara imza atmasına ümidli idilər. Müəyyən dövr yaxşı nəticələrə də sevindik, Avropa həyəcanını da yaşadıq. Əfsuslar olsun ki, bunun davamını gətirmək alınmadı.
- Siz qalsaydınız, bu uğurların davamını gətirə bilərdiz? Ümumiyyətlə, necə düşünürsünüz, baş məşqçi postunda siz olsaydınız, "Səbail" aşağı dəstəyə düşərdi?
- Bu suala cavab vermək çətindir. Çünki tək mənim qalmağımla deyildi, klub fəaliyyətini vahid bir sistem üzrə davam etməliydi. Birlik olmayan yerdə hansısa uğurdan danışmaq olmaz. "Mən qalsaydım nə olardı" haqqında danışmaq da gecdir. Ümid edirəm, komanda həvəsdən düşməyib yenidən Premyer Liqaya qayıdar. "Səbail"ə uğurlar arzulayıram.
Aytac Sahəd
İdman.biz
