Aftandil Hacıyev: Baş məşqçi dəyişikliyi milli komanda üçün ümidverici başlanğıcdır

"AFFA-nın Fernandu Santuşla yollarını ayırması düzgün qərar idi".

İdman.biz xəbər verir ki, bu sözləri AZƏRTAC-a açıqlamasında "Qarabağ" Futbol Akademiyasının baş koordinatoru Aftandil Hacıyev deyib.

Mütəxəssis Fernandu Santuşun Azərbaycan millisinin baş məşqçi postundan istefaya göndərilməsinə münasibət bildirib: "Hamıya məlumdur ki, bu addım bir günün içində atılmayıb. Portuqaliyalı mütəxəssisin rəhbərliyi altında milli komandamız nəticə qazana bilmirdi, qələbələr yox idi. Son oyunlarda futbolçularda milli ruhun və motivasiyanın azaldığı hiss olunurdu. Komanda sanki matçlara inamsız çıxırdı. Bu səbəbdən qərar mənim üçün gözlənilməz olmadı".

Onun sözlərinə görə, müvəqqəti baş məşqçi təyin olunan Ayxan Abbasovun rəhbərliyi altında yığmanın oyununda müsbət dəyişiklik gözlənilir: "Ayxan Abbasov gənc və motivasiyalı mütəxəssisdir. İnanıram ki, onun rəhbərliyi ilə futbolçularda milli ruh bir oyunluq da olsa, geri qayıdacaq. Dünya çempionatının seçmə mərhələsinə yaxşı əhvali-ruhiyyə ilə başlamadıq. Qrupun ən zəif komandalarından biri hesab edilən İslandiyaya 0:5 hesablı məğlubiyyət heç də yaxşı olmadı. Ardınca Ukrayna ilə matç öncəsi baş məşqçinin istefası da xoş hal deyil. Amma ümid edirəm ki, bugünki matçdan ən azı 1 xalla ayrıla biləcəyik. Çünki bu səviyyədə olan komandalara qarşı əvvəlki qarşılaşmalarda xal qazanmağı bacarmışıq".

A.Hacıyev qeyd edib ki, Azərbaycan millisi üçün bu mərhələdə ən vacib məqam psixoloji durumdur: "Komandada futbolçulara inam aşılamaq, birliyi qorumaq çox önəmlidir. Əks halda, arzuolunmaz nəticələr davam edə bilər. Ümid edirəm ki, dəyişiklik milli üçün yeni başlanğıc olacaq".

Qeyd edək ki, bu gün Tofiq Bəhramov adına Respublika Stadionunda keçiriləcək Azərbaycan – Ukrayna qarşılaşması saat 20:00-da başlayacaq.

İdman.biz