Sport24.az
"Bu gün Qubada veteranlar arasında 31 Dekabr Dünya Azərbaycanlılarının Həmrəylik gününə həsr olunmuş turnir start götürəcək. 8 komandanın qatılacağı yarış 18-də başa çatacaq". Bu sözləri Sport24.az-a açıqlamasında Veteranlar İttifaqınən sədri Oqtay Abdullayev bildirib.
Oqtay bəy turnirin təşkil olunmasında gənclər və idman nazirliyinin müstəsna xidməti olduğunu bildirməklə yanaşı, AFFA-nın veteranlara diqqət ayırmadığını da vurğulayıb: "AFFA prezidenti Rövşən Nəcəflə görüşmək üçün 3 dəfə məktubla rəsmi müraciət etmişəm. 7-8 ayda eşitdiyim ancaq "bu gün-sabah" sözləri olub. Sonra deyirlər ki, futbol veteranları ölkə futboluna biganədi, fəaiyyəti gözə dəymir. Fürsətdən istifadə edib qarşı tərəfə sual verirəm? Siz nə vaxt bizimlə görüşdüz, bizi dinlədiz? Həmişə demişəm və təkrarlayıram, futbol veteranlarının təcrübəsindən və bacarığından istifadə etmək lazımdı. AFFA rəhbərliyi veteranlarla görüşmək, dinləmək istəmirsə, onda niyə barəmizdə xoşagəlməz fikirlər səsləndirirlər?
Rövşən Nəcəf bizimlə görüşməsə də, cənab nazir Fərid Qayıbov məni qəbul etdi. Ona belə bir turnir keçirmək istədiyimizi söylədim. Sağ olsun, təklifi müsbət qarşıladı və bütün xərcləri qarşılayacaqlarını bildirdi. Buna görə, Fərid müəllimə veteranlar adından təşəkkür edirəm. Hələ onu da bildirdi ki, gələn il belə turniri Qəbələdə təşkil etmək lazımdı. Eşitdiyimə görə, Qəbələ 2025-ci ildə ölkənin "idman paytaxtı" olacaq".
Qeyd edək ki, Qubada təşkil olunacaq turnirdə 8 komanda - Azərbaycan millisinin veteranları, "Neftçi", "Sumqayıt", Həvəskatrlar Liqasının veteranları, Quba, Şabran, Xaşmaz və Qusar mübarizə aparacaq.
