Report.az
AFFA-nın Yarışların Təşkili Departamentinin azarkeşlərlə iş üzrə koordinatoru Yusif Abdullayev İsveçin Malmö şəhərində keçirilən Avropa Futbol Azarkeşləri Konqresi-2025 (EFFC) tədbirində iştirakı ilə bağlı fikirlərini bölüşüb.
O, bu barədə "Report"a açıqlama verib.
Y. Abdullayev tədbirin yüksək səviyyədə təşkil olunduğunu bildirib:
"EFFC-2025 tədbiri azarkeş siyasətinin inkişafı, təcrübə mübadiləsi və Azərbaycanın beynəlxalq platformalarda təmsil olunması baxımından çox önəmli idi. Burada iştirakımız ölkəmizdə azarkeş təcrübəsinin yaxşılaşdırılması, stadion infrastrukturunun əlçatanlığının artırılması və fanatlarla əlaqələrin möhkəmləndirilməsi istiqamətində apardığımız işlərə töhfə verəcək. Tədbir Avropanın müxtəlif ölkələrindən olan azarkeş nümayəndələrini, futbol federasiyalarının və klub rəhbərlərinin nümayəndələrini, eləcə də digər maraqlı tərəfləri bir araya gətirərək, tərəfdar mədəniyyətinin gələcəyi, inklüzivlik, təhlükəsizlik və digər bir çox məsələləri əhatə edirdi. Azərbaycan millisinin fiziki qüsurlu azarkeşi Babək Ağalarov mənimlə birlikdə sözügedən tədbirdə iştirak etdi və Avropa futbol təcrübəsində baş verən hadisələrdən agah oldu".
Onun sözlərinə görə, iyunun 26-da açılış iclasında qurumun sədri Ronan Evainin son bir il ərzində fanat təcrübələrində gördükləri işlərdən, inkişaf mərhələsində olduqlarından bəhs edib:
"Tədbirdə eyni zamanda azarkeşlərin qərarvermə prosesində iştirakı, futbolun müxtəlifliyə və inklüzivliyə açıq olması, təhlükəsizlik və azyaşlıların müdafiəsi kimi mövzular müzakirə olundu. Bundan əlavə, əlilliyi olan fanatların qarşılaşdığı çətinliklər, stadionların inklüziv olması və effektiv kommunikasiya strategiyaları ilə bağlı praktiki həllər təqdim olundu. Həmçinin Avropanın Futbol Azarkeşləri (FSE) kimi təşkilatlarla və digər beynəlxalq tərəfdaşlarla birbaşa ünsiyyət imkanı yarandı".
