Idman.biz
AFFA rəhbərliyində yer alan əksər şəxslər Fernandu Santuşun tezliklə istefaya göndərilməsinə tərəfdardır.
İdman.biz Sportinfo.az-a istinadən xəbər verir ki, bu barədə federasiyadan bildirilib.
Məlumata görə, millinin dünya çempionatının seçmə mərhələsinə böyükhesablı məğlubiyyətlə başlaması yönətimin hazırkı baş məşqçiyə münasibətini kəskin dəyişib. İslandiya səfərində qeydə alınan darmadağın (0:5) AFFA başbilənlərini yerindən tərpədib.
Rəsmilər arasında bununla bağlı məşvərət keçirilib. Vitse-prezident Balakişi Qasımov və Maksud Adıgözəlov portuqaliyalı mütəxəssisin təcili istefaya göndərilməsini istəyib, bu vəzifəyə yerli çalışdırıcının gətirilməsinin vacibliyini qeyd edib. Baş katib Cahangir Fərəcullayev də onunla yolların ayrılmasına tərəfdardır.
Elşad Nəsirov Fernandu Santuşa etimadın davam etdirilməsindən yanadırsa, prezident Rövşən Nəcəf yekun qərarın sentyabrın 9-da verilməsinin lehinədir. O, bu qənaətdədir ki, həmin gün Ukrayna ilə keçiriləcək ikinci matçın nəticəsini gözləmək lazımdır.
İdman.biz
