Idman.biz
AFFA rəhbərliyi bölgələrə səfərlər çərçivəsində cənub zonasına səfər edib və yerli futbol infrastrukturunun mövcud vəziyyəti ilə yerində tanış olub.
İdman.Biz xəbər verir ki, səfərdə AFFA-nın baş katibi Cahangir Fərəcullayev, baş katibin müavini Kamran Vəliyev, Futbolun İnkişaf Fondunun icraçı direktoru Tural Piriyev və İnkişaf Strategiyasının icrası üzrə layihə qrupunun dövlət qurumları ilə əlaqələrinə məsul şəxs Ramazan Səmədov iştirak ediblər.
Səfər Biləsuvar və Cəlilabad rayonlarından başlayıb. AFFA rəsmiləri həmin ərazilərdə yerləşən Olimpiya İdman Komplekslərinə və yerli stadionlara baxış keçirərək mövcud şərait və inkişaf perspektivləri barədə məlumat alıblar.
Daha sonra nümayəndə heyəti Lənkəran Olimpiya İdman Kompleksinə baş çəkib. Burada Kütləvi Futbol Turniri çərçivəsində uşaqlar arasında Beynəlxalq Futbol Gününə həsr olunmuş yarış izlənilib. AFFA tərəfindən iştirakçılara futbol topları və formalar hədiyyə edilib. Səfər zamanı müxtəlif qurumların və yerli nümayəndələrin iştirakı ilə bir sıra faydalı görüşlər də baş tutub.
Cənub turu daha sonra Ərkivan qəsəbə stadionuna və Masallıda yerləşən Anatoli Banişevski adına stadiona baxışla davam edib.
Səfərin sonunda AFFA nümayəndələri Salyan Olimpiya İdman Kompleksində mövcud infrastrukturla tanış olublar.
