AFFA Məşqçilər Komitəsinin sədri: "Ümid edirəm ki, “Qarabağ” yenə bizləri qələbələrilə sevindirəcək"

"Qarabağ"a inamımız hədsizdir. Hər bir komanda "qara zolağ"a düşə bilər. Hazırda təmsilçimiz həmin zolaqdan çıxmağa cəhd göstərir. Ümid edirəm ki, "Qarabağ" yenə bizləri qələbələri ilə sevindirəcək".  Bunu Sport24.az-a AFFA Məşqçilər Komitəsinin sədri Vaqif Sadıqov "Qarabağ"ın Avropa Liqasının 2-ci turunda "Malmö"yə məğlubiyyətini (1:2) şərh edərkən deyib.

Sadıqov "Qarabağ"ın ardıcıl məğlubiyyətlərini futbolçuların fiziki və psixoloji yorğun olması ilə əsaslandırıb:

"Kimdəsə səhv axtarmağa ehtiyac yoxdur. Baş məşqçi Qurban Qurbanov komandasına bələddir. Yaddan çıxartmayaq ki, iyul ayından başlayaraq çətin qrafikdədirlər. Futbolçular Avropada, yerli çempionatda və milli komandaların heyətlərində çıxış edir. Nəzərə alsaq ki, evdə bir neçə oyundur qalib gələ bilmirik. Bu yüklənmələr belə bir vəziyyətə gətirib çıxara bilər. Ardıcıl məğlubiyyətlərdən sonra komanda fiziki və psixoloji durumdan çətinlik çəkir. Vəziyyətdən çıxış yolu hamımızın "Qarabağ"ın yanında olmağıdır. Hər iki oyunda "Dinamo"ya məğlub olub, Çempionlar Liqasından uzaqlaşmağımız onu göstərir ki, istədiyimiz "Qarabağ"ı görə bilmirik. Bu hər komandanın başına gələn hadisədir. Arzu edək ki, tez bir zamanda qara buludlar komandamızın başının üstündən gedəcək. Hələ xeyli komandalar var ki, onlar da xal qazana bilməyib. Hər şey çempionumuzun əlindədir. Çətin duruma düşən "Qarabağ"ı da görmüşük, o durumdan çıxanı da. Qarşıdakı "Ayaks"la oyunda müsbət nəticə qazanıb, bizləri sevindirəcək".

Sadıqov təmsilçimizin Avropada uğursuz çıxışını çempionatın rəqabətsizliyindən olduğunu bildirib:

"Rəqabətsiz çempionatımızın olması öz təsirini göstərir. Rəqabətli çempionatımız olsa, yaxşı olar. "Qarabağ"la başa-baş mübarizə aparan komandaların sayı nə qədər çoxalsa, ümümi futbolumuza, həmçinin də "Qarabağ"a avropadakı çıxışına müsbət təsirini göstərər.