AFFA-da iclas, yoxsa “Qış nağılı”

Mübarək iclas baş tutdu. AFFA İcraiyyə Komitəsinin "Yeni il şənliyi"ni nəzərdə tuturam. Yığışdılar, baxışdılar, danışdılar, dağılışdılar. Bəs AZAL-ın məşhur rəhbərinin təbirincə desək, "nə verdi baş"?

İclasın yekunu barədə yayılan məlumat 2025-ci ilin futbolumuz üçün dönüş nöqtəsi olacağını göstərir. Məsələn, ilin sonunda 9 aydı gəzdirilən inkişaf strategiyasının təqdim ediləcəyini dilə gətirən icraçı vitse-prezident Sərxan Hacıyevin dedikləri hava şarı kimi partladı. "Bəyin oğurlanması"nda deyildiyi kimi: "Sən söhbətini elə".

Gəldik çatdıq Fernandu Santuşun rəhbərliyi altında Millətlər Liqasındakı rəzalətə. İlahi, əvvəllər "yağmasa da, guruldayan" İcrakom üzvlərindən bəziləri hər hansısa bir uğursuzluqdan sonra baş məşqçiyə etiraz edər, narazılığını dilə gətirərdi. İndiki halda isə… Sitat: "Əvvəlcə Azərbaycan milli komandasının baş məşqçisi Fernandu Santuşun komandamızın UEFA Millətlər Liqasındakı çıxışı ilə bağlı hesabatı dinlənilib. İcraiyyə Komitəsi üzvləri baş məşqçinin qeydə alınmış nəticələrlə bağlı fikirləri ilə tanış olublar. F.Santuş millimizin gələcək perspektivləri barədə gözləntilərini bölüşüb".

Ağaşı liqaya düşən millinin baş məşqçisinə bir nəfər də olsun deməyib ki, ay, qonaq, min təyyaryə, get, gəldiyin yerə? Santuşun təyinatı zamanı namizədliyinin guya müzakirə edildiyini və birgə qərar verildiyini deyən Sərxan Hacıyev indi millinin fiaskosuna görə hansısa məsuliyyətə cəlb olunacaqmı? Diqqət yetirin, 70 yaşlı baş məşqçi gözləntiləri barədə danışıb. Bu, bilirsiz nəyə bənzəyir? Kiminsə yubiley məclisində yaxınları babat vurandan sonra səbəbkara söz verilir. O da ağzı masaya dəyə-dəyə "dostlarım sağ olsun, onlardan gözləntilərim çox olub, olacaq da" deyərək, növbəti badəni boşaldır.

A kişi, nə gözlənti? Gözləntini gördük e! Millətlər liqası yaranandan bəri heç vaxt qrup sonuncusu olmayan komandamıza bunu Rövşən Nəcəfin şəxsən seçdiyi və hələ də qoruduğu Santuş yaşatdı. Şəxsən mənə görə, dünənki iclasın boşa verilməsinə görə, heç bir İK üzvü yaxasını kənara çəkə bilməz! Kimsə bu tragikomediyaya etiraz edibsə, icyimaiyyətə açıqlama verməlidi. Əksə halda, hər bir İK üzvü bu rəzalətin pay sahibi hesab olunacaq.

Və sonda. İcraiyyə Komitəsinin iclasları açıq formatda keçirilməlidi. Bax, onda kimin hansı havanı ifa etdiyi aşkar görünəcək.