Sport24.az
Gələn ilin əvvəli müxtəlif yaş qrupu üzrə yığmaların baş məşqçiləri postunda dəyişiklik olacaq. Bu barədə Sport24.az-a etibarlı mənbədən məlumat daxil olub.
Redaksiyamıza ötürülən bilgiyə əsasən, AFFA rəhbərliyi aşağı yaş qrupu üzrə millilərin çalışdırıcılarının işindən narazıdır və onlarla vidalaşmaq istəyir. Söhbət U-19-un baş məşqçisi Elxan Abdullayev, U-18-in "sükanı arxasında" olan İham Yadullayev və U-15, U-17-də eyni vəzifəni icra edən Aqil Nəbiyevdən gedir. Adını qeyd etdiyimiz məşqçilərin müqaviləsi 2026-cı ilin yanvarın 1-də başa çatır. Onlarla yeni anlaşmanın imzalanmaması nəzərdə tutulub.
Mənbəmiz onu da bildirib ki, artıq aşağı yaş qruplarına təyin olunacaq mütəxəssislər də məlumdur. Ancaq AFFA rəsmiləri bunu gizli saxlamağı lazım bilir.
