Idman.biz
Azərbaycan çempionatının II Liqasında keçirilən XXV turun "Ağdaş" – "Dinamo" oyununda yaşanan qalmaqala hüquqi qiymət verilib.
İdman.biz xəbər verir ki, AFFA-nın İntizam Komitəsi matçda baş verənlərə görə günahkarları cəzalandırıb.
Görüşün 90-cı dəqiqəsində "Ağdaş" azarkeşləri tərəfindən kütləvi şəkildə intizamsızlıq edildiyinə görə klub 400 manat cərimələnib. Azarkeşləri tərəfindən rəqib komandanın ünvanına kütləvi şəkildə təhqiramiz ifadələrin səsləndirildiyinə və bu hal cari mövsümdə ilk dəfə yaşandığına görə "Ağdaş"a xəbərdarlıq edilib.
Qonaqların futbolçusu Əlisa İsayev qeyri-etik ifadə və ya hərəkətə görə birbaşa qırmızı vərəqə aldığı üçün 3 oyun cəzalanıb, klub 200 manat cərimə olunub. Onun komanda yoldaşl Əkbər Səfərzadə ikinci sarıdan qırmızı vərəqə aldığı üçün 1 oyun cəzalanıb, "Dinamo" 50 manat cərimə edilib.
"Ağdaş"ın futbolçusu Səbuhi Ağayev təcavüzkar davranışa (rəqibi vurduğuna) görə birbaşa qırmızı vərəqə aldığı üçün 4 oyunluq cəza alıb. Klub 300 manat cərimələnib.
İdman.biz
