Adino Mustedanaqiç: "Futbolçular bu əfsanənin reallaşması üçün əllərindən gələni etdilər."

"Həyəcan, sevinc və düzünü desəm, bir az da inanılmaz bir hissdir. Mövsümə iki komanda ilə başlamaq nağıla bənzəyir – sanki baş verməsi çətin bir şeydir. Təkcə bir komandaya rəhbərlik etmək özü kifayət qədər çətindir, ikisinə rəhbərlik etmək isə daha da çətin. Amma şükür ki, əlimdə zəhmətkeş bir heyət və hər addımda bizi dəstəkləyən klub var idi. Futbolçular isə bu nağılın gerçəyə çevrilməsi üçün üzərlərinə düşəni etdilər". Bu sözləri Sport24.az-a açıqlamasında "Sabah"ın U-19 və əvəzedici komandalarının baş məşqçisi Adino Mustedanaqiç deyib.

Xorvatiyalı mütəxəssis əvəzedicilərin çempionatında çempionluğun taleyi həll olunduğu "Neftçi - 2" ilə matç barədə fikirlərini bölüşüb:

"Əlbəttə ki, rəqibin aldığı qırmızı vərəqə oyuna təsir etdi. Taktiki dəyişikliklər etdik və ikinci hissəyə çox yaxşı başladıq. Düşünürəm ki, bizim təzyiqimiz, tempimiz və qətiyyətimiz də bu qırmızı vərəqəyə təsir göstərdi. Amma qeyd etməliyəm ki, birinci yarıya da yaxşı başladıq, sadəcə "Neftçi"nin cərimə zərbəsi bizi bir az sarsıtdı. Buna baxmayaraq, yenə də çempionluğa layiq qalib ruhumuzu nümayiş etdirdik. İndi istirahət vaxtıdır. Hər zaman olduğu kimi, klub rəhbərliyi ilə birlikdə oturub danışmalıyıq. Keçən il ilk dəfə Avropa turnirində iştirak etdik və ikinci mərhələdən başladıq. Bu il daha yaxşı olmalıyıq".

Mustedanaqiç uşaq futbolundakı əsas problemlərdən söz açıb:

"Keyfiyyət ön planda olmaq əvəzinə, say çoxluğuna üstünlük verilməsi və uzunmüddətli, kompleks yanaşmanın olmamasıdır. Halbuki bütün sahələri bir-birinə bağlı şəkildə inkişaf etdirmək lazımdır ki, istedadların yetişəcəyi mühit formalaşsın".

Qeyd edək ki, "Sabah"ın əvəzedici komandası Azərbaycan çempionatının qalibi olub. "Bayquşlar" mövsümü 69 xalla birinci sırada bitirib.

Komandanın bas məşqçisi Adino Mustedanaqiç eyni zamanda həm də U-19-a rəhbərlik edib və həmin kollektiv də liqasında çempion olub.