Idman.biz
"Kəpəz"in baş məşqçisi Adil Şükürovun futbolinfo.az saytına müsahibəsi
– "Kəpəz"ə qayıdışınız necə baş tutdu? Son mövsümün əvvəlində həmin postu tərk etdiyinizi nəzərə alsaq, təklifə "hə" deyərkən heç tərəddüd etdinizmi?
– "Kəpəz" mənim üçün dəyəri böyük olan bir klubdur və bu klub bir çox məşqçilər üçün böyük futbol məktəbidir. Bu klubda çalışmış məşqçilər üçün öyrəndikləri gələcək karyeralarında olan yüksəliş yolunun başlanğıcıdır. "Kəpəz"dən gedişim isə klubun Premyer Liqada qalmasına hesablanmış bir addım idi. Bu barədə o vaxt klub rəhbərliyi və azarkeşlərlə görüşdə də bildirmişdim.
– "Kəpəz"in son illərdə hədəfi Premyer Liqadakı yerini qorumaq olurdu. Növbəti mövsümdə isə klubun iddiasının artacağı gözlənilir. Rəhbərlik qarşınıza növbəti sezonla bağlı konkret hansı hədəfi qoyub?
– Yeni "Kəpəz" üçün hədəf inkişaf yoludur. İnkişaf deyildikdə isə rəqabətədavamlı komanda formalaşdırmaq və bacardıqca çempionatda yüksək yerlərdə qərarlaşmaq nəzərdə tutulur.
– Növbəti mövsümdən çempionatda legioner limiti olmayacaq. Bu qərar sizin də planlarınıza təsir edəcəkmi? Yəni yeni sezonda "Kəpəz"in də heyətinin əsasını əcnəbilər təşkil edəcək?
– Limit ləğv olunduqdan sonra bütün komandalarda güc əsasən legioner oyunçuların üzərinə düşəcək. Biz də bu durumda yerli və legioner futbolçulardan ibarət rəqabətə dayanıqlı komanda formalaşdırmağa çalışırıq. Təbii ki, burada klubun imkanları da nəzərə alınmalıdır və buna uyğun da işlər qurulacaq.
– Hansı mövqelərlə bağlı narahatlığınız var? Hansı mövqeləri gücləndirmək fikrindəsiniz?
– Qeyd etdiyim kimi, limit ləğv olunduqdan sonra əksər klublarımızda güc daha çox legioner futbolçuların üzərinə düşəcək. "Kəpəz"də də bu baxımdan işlər aparırıq ki, komandanı planlaşdırdığımız səviyyəyə çatdıraq.
– "Kəpəz"in yeni mövsümə hazırlıq planı bəllidirmi? Komanda ölkə xaricində toplanış keçəcək?
– İnşallah, hazırlığa iyun ayının sonlarında başlamağı planlaşdırırıq. Hazırlıq planı tam müəyyənləşdikdən sonra bu barədə məlumat verə bilərəm.
İdman.biz
