Idman.biz
"Çox danışılası bir şey yoxdur. Qapımızda gördüyümüz 3 kuryoz qol komandanı dayandırdı. Bundan sonra imkanlarımız oldu, amma istifadə edə bilmədik. Məğlubiyyət üzücüdür, yaxşı hal deyil. Qarşıda milli fasilə gəlir. Komandanı toparlamağa çalışacağıq. Məşqdə gördüyümüz futbolçularla oyunda gördüklərimiz tam fərqlidir. Bu, bizi üzür. Vəziyyəti düzəltməyə çalışacağıq".
İdman.biz xəbər verir ki, bunu "Kəpəz"in baş məşqçisi Adil Şükürov Misli Premyer Liqasının III turunda səfərdə "Zirə"yə 0:5 hesablı məğlubiyyətdən sonra keçirilən mətbuat konfransında deyib.
- Rəhbərlik sizə verdiyi sözlərə əməl edib?
- Futbolçuların məşqlərdə etdiklərinin qarşılığını oyunlarda görə bilmirik. Nəsə böyük problemimizin olduğunu deyə bilmərəm. Oyuna çıxanda tam fərqli futbolçular görürük. Rəhbərlik komandaya yeni oyunçular cəlb etməyə çalışır. İki yeni futbolçu transfer etdik. İnanıram ki, onların bizə faydası olacaq.
- Bu məğlubiyyət istefanıza səbəb ola bilər?
- Adil Şükürov bu məğlubiyyətlərlə daha da güclü olmalıdır. İlk növbədə özüm toparlanmalıyam, sonra isə komandanı toparlamalıyam. İnandığımız üçün bu gün buradayıq.
- Ryonosuke Ohori komandaya nə vaxt qoşulub?
- Dünəndən bizimlədir. Gələcəkdə "10 nömrə" mövqeyində onu görmək istəyirik. Həmin mövqedə komandamıza fayda verəcək.
- "Neftçi"yə lazım olmayan Ryonosuke Ohorini icarəyə götürdüz. Bu transfer sizin istəyinizlə olub?
- Bu futbolçuya əvvəldən marağımız var idi. İyun ayından onunla danışırdıq. "Neftçi" onu başından etmək istəsəydi təlim-məşq toplanışına aparmazdı.
İdman.biz
