İdman.biz
"Belə oyunlardan sonra danışmaq ağırdır".
İdman.biz xəbər verir ki, bunu "Kəpəz"in baş məşqçisi Adil Şükürov deyib.Gənc mütəxəssis Azərbaycan Premyer Liqasının IV turunda "Səbail"lə 0:4 hesablı məğlubiyyəti şərh edib: "Daha yaxşı komanda görmək istəyirik. Amma komanda istədiklərimizi meydanda həyata keçirə bilmir. Vaxt lazımdır. O vaxtı qazana bilsək... Rəhbərliklə danışmışıq. İstəyirlər ki, komandamıza yeni oyunçular cəlb edək. Bu yöndə işlərimiz davam edir".
Şükürov komandanın uğurlu çıxışı üçün vaxta ehtiyac olduğunu deyib: "Sıfırdan yığılan komandaya ayyarım bəs etmir. Vaxt lazımdır. Hətta nəzərə alsaq ki, komandadakı oyunçuların hamısı gəncdir. Daha uzun müddət lazımdır. Komanda hazırlaşıb. Bu kollektiv gələcəkdə gücünü göstərəcək. Etdiyimiz səhvlərdən sonra qollar buraxırıq. Komanda az səhv etməlidir ki, qol buraxmasın. Bunları görürük".
Qeyd edək ki, "Kəpəz" keçirdiyi hər 4 oyunda məğlub olub.
İdman.biz
