İdman.biz
"Əvvəlki oyunlara nisbətən bu gün cuzi də olsa müəyyən şeylərin düzəldiyini görmək mümkündür".
İdman.biz xəbər verir ki, bunu "Kəpəz"in baş məşqçisi Adil Şükürov deyib.
Gənc mütəxəssis Azərbaycan Premyer Liqasının III turunda "Turan Tovuz"a 0:3 hesablı məğlubiyyəti şərh edib. Şükürov komandanın əsas liqada yerini qoruyacağını əminliklə vurğulayıb: "Biz yeni komanda qururuq. Heyət yenidən formalaşır. Hər dəfə oyunlardan sonra bunu deyirəm. Bu gün yenə vurğulamaq istəyirəm. Komandanın özünə gəlməsi üçün vaxt lazımdır. Soruşa bilərsiniz ki, nə qədər zaman lazımdır? Onu deyim ki, yeni futbolçuların bir-birinə uyğunlaşması çox vacib amildir. Bu da vaxt aparan bir prosesdir. Nə qədər tez futbolçular adaptasiya dövrünü keçsələr, bizim oyunumuz bir o qədər tez düzələcək və nəticələr gələcək. Əvvəlki oyunlara nisbətən bu gün cuzi də olsa müəyyən şeylərin düzəldiyini görmək mümkündür. Ümid edirəm ki, qarşıdakı matçlarda nəticəyə yönələn oyunlar izləyəcəyik. Komanda aşağı liqaya düşməyəcək. Mənim istəyim komandanın futbol oynamasıdır".
Qeyd edək ki, keçirdiyi hər 3 oyunda uduzan "Kəpəz" hələ qol vura bilməyib.
İdman.biz
