Sport24.az
"Qəbələ"nin bu yay "rənglərinə bağladığı" legionerlərdən biri də Abdullahi Şuaybudu. "Kəpəz"in heyətində Premyer Liqada ümumilikdə 45 oyuna çıxan, ötən mövsümün gedişində xəstəlik səbəbindən Gəncə klubunu tərk edən 22 yaşlı nigeriyalı hazırda "qırmızı-qaralar"ın uğuru üçün tər tökür. 7 turdan sonra aktivində 4 qol olan futbolçu Sport24.az-a müsahibə verib.
- "Kəpəz"dən ayrıldıqdan sonra bir müddət Azərbaycanı tərk etdin. Geri dönüşündə isə çoxlarının gözləmədiyi halda I Liqada çıxış edən "Qəbələ" ilə anlaşdın. Komandanın çıxışından və nəticələrdən razısan?
- Bəli, komandamız yaxşı oyun nümayiş etdirir. Nəticələrimiz də bunu sübut edir. Heyətin və "Qəbələ"nin inkişafından razıyam. Komandamızın göstərdiyi performans, məncə, çox əladır.
- I Liqa ilə elita arasında səviyyə fərqi böyükdü?
- Məncə, I Liqa və Premyer Liqa arasındakı fərq ondan ibarətdir ki, elitada təcrübəli və tanınmış oyunçuların sayı daha çoxdur. Bunu həmçinin klublara da aid etmək olar. Bir çox klub aşağı liqa təmsilçiləri ilə müqayisədə daha çox inkişaf edib və peşəkarlaşıb. Sözün düzü, fikrimcə, I Liqa da çətindir. Kənardan baxanda buranın daha asan olduğu görünə bilər. Lakin əslində I Liqa heç də düşünüldüyü qədər asan deyil. Hər yerin, hər mərhələnin öz çətinliyi olur.
- Heç şübhəsiz ki, "Qəbələ"nin qarşısına Premyer Liqaya qayıtmaq məqsədi qoyulub. Hədəfə şatmaq çətin olmayacaq?
- Məqsədimiz hər kəsə bəllidir. I Liqada çempion olmaq və Premyer Liqaya dönmək. Düşünürəm ki, komandamız buna hazırdır. Oyunlarımız , nəticələrimiz də məqsədə doğru getdiyimizi göstərir. Məncə, komandamız bu il çempion olmaq potensialındadır. İnşallah gələn mövsüm yenidən elitada mübarizə aparacağıq.
- Heyətdə gənclər üstünlək təşkil edir. Onlarla bir yerdə oynamaq sizin kimi təcrübəlilərə çətin deyil ki?
- Bəli, komandada gənc oyunçular çoxdur. Lakin mən də özümü hələ onların sırasında görürəm. Oyunçularımızın hər biri komanda üçün çox vacibdir. Gənc futbolçularımız da daim öz üzərilərində işləyirlər. Bütün komanda yoldaşlarımla münasibətim çox yaxşıdır. İstənilən məsələdə - meydanda da, meydandan kənarda da bir birimizə köməklik göstərməyə çalışırıq. Bəli, Premyer Liqa təcrübəmi onlarla paylaşıram. Bu mənim üçün çox vacibdir. Çünki əsl komanda işi budur. Biz hər zaman bir birimizə yardım etməyi özümüzə borc bilirik. Çünki, biz "Qəbələ" ailəsiyik.
