Idman.biz
"Qarabağ"ın kapitanı Abdulla Zubir "Ayntraxtla" oyundan sonra UEFA-nın rəsmi kanalına açıqlamada komandasının əzmkar qələbəsini və qarşıdakı oyundan gözləntilərini dəyərləndirib.
İdman.Biz xəbər verir ki, yarımmüdafiəçi qələbənin son anlarda qazanılmasının xüsusi emosiyalar yaratdığını bildirib:
"Biz qol vurduq və final fiti səsləndi. Bu, möhtəşəm idi. Oyunun lap son dəqiqəsində, hətta son saniyəsində qalib gəldik".
A.Zubir görüşün son dərəcə ağır keçdiyini vurğulayıb:
"Oyun çox çətin alındı. Biz bütün gücümüzü ortaya qoyduq və sonda qalib gələ bildik. Bu, inanılmaz idi, çox xoşbəxtik".
Ağdam təmsilçisinin futbolçusu qələbədə həlledici məqamın nə olduğu barədə də danışıb:
"Əsas amil heç vaxt təslim olmamaq idi. Həm müdafiədə, həm də hücumda tam gücümüzlə oynadıq, hamı vahid komanda kimi çalışdı. Bilirdik ki, erkən qol vurmağımıza baxmayaraq, çətin olacaq. Məhz buna görə bu qələbə bizim üçün xüsusilə dəyərlidir".
Pley-off mərhələsinə yüksəlmə şansları ilə bağlı suala cavab verən Abdulla Zubir isə belə deyib:
"Bunu indidən demək çətindir. Qarşıda bizi Liverpulda daha bir çox ağır oyun gözləyir. Əlimizdən gələni edəcəyik. Çox çətin olacaq, çünki dünyanın ən güclü komandalarından birinə, fantastik kollektivə qarşı oynayacağıq".
