Sport24.az
"Sabah"ın futbolçusu: "Qarabağ"la oyunu sınaq adlandırmazdım - MÜSAHİBƏ
"Sabah"ın futbolçusu Abdulla Xaybulayevin Sport24.az-a müsahibəsi
- Azərbaycan Kubokunun yarımfinal mərhələsinin cavab oyununda "Neftçi" ilə heç-heçə edərək finala vəsiqə qazandınız. Oyun barədə nə deyə bilərsən?
- İlk oyunda qalib gəlsək da, cavab oyununun çətin keçəcəyini bilirdik. Gözlənildiyi kimi də oldu. İki qarşılaşmanın nəticəsinə görə finala çıxa bildiyimiz üçün çox sevinirik.
- "Sabah" tarixində ilk dəfə finala vəsiqə qazandı. Bu necə hissdir?
- İzaholunmaz hisslərdir. Artıq uzun müddətdir ki, bu klubdayam və "Sabah"la birgə kubok qazanmağı çox istəyirəm.
- Finalda "Qarabağ"la üz-üzə gələcəksiniz. Rəqib ölkənin ən güclü kollektivi hesab olunur. Titula sahib çıxmaq mümkün olacaqmı?
- Bəli, "Qarabağ"ın gücünü hamı bilir, amma bu, onlarla oynamağın mümkünsüz olduğu anlamına gəlmir. Meydana çıxacaq və klub üçün ilk kuboku qazanmağa çalışacağıq.
- Premyer Liqanın növbəti turunda məhz elə "Qarabağ"la üz-üzə gələcəksiniz. Bu matç final öncəsi sizin üçün sınaq ola bilərmi?
- Bunu sınaq adlandırmazdım, çünki finala hələ bir ay var. Bu müddət ərzində çox şey dəyişə bilər. Amma istənilən halda, çempionatda növbəti mühüm oyunlarımızdan biridir. Düşünürəm ki, azarkeşlər maraqlı oyunun şahidi olacaqlar.
- Çempionatın başa çatmasına beş tur qalıb. "Sabah"ın mövsümün sonunadək hədəfi nə olacaq?
- Qalan bütün oyunları qazanmaq istəyirik. Bunun üçün sona kimi mübarizə aparacağıq.
- Necə düşünürsən, səncə, "Sabah" növbəti mövsüm Premyer Liqada çempionluq uğrunda mübarizə apara bilərmi?
- Bunu gələn mövsüm görəcəyik. İndi isə yalnız çempionatdakı qarşıdakı oyunlarımız və kubokun finalı barədə düşünürük.
