Sport24.az
TƏRLAN ABBASZADƏ
U-21 yeni eraya, Ayxan Abbasovun dönəminə qədəm qoydu. Bu günlərdə futbol camiəsinin əsas mövzusu da məhz budur. Bəzi mütəxəssislər açıq-aydın deməsələr də, səhnə arxasında "bir məşqçinin iki yerdə işləməsi dügün deyil, Abbasova belə etimad hardandır" sualını verib, bu təyinata ağız büzürlər.
Nəyə desəz and içərəm ki, belələrinin sayı heç də az deyil. Ayxan bəyin ümid yığmasına baş məşqçi təyin olunacağını yazdığımız gündən indi adlarını çəkmək istəmədəyim, ancaq ölkənin futbol camiəsində yetərincə tanınan və nüfuzu olan neçə-neçə məşqçi "doğrudan Ayxan U-21-ə gəlir?" sualını verib, təsdiq cavabını eşidincə, "bu düzgün deyil. O, nə edib ki, həm klubda, həm də millidə işləyəcək" söyləyib. Hamısına da cavabımız eyni olub. Abbasov olduğu yeri haqq edib, hələ gələcəkdə daha yüksək zirvələri fəth etmək potensialı olan məşqçidir. O, bunu işi və əməli, ədalətli qərarları, məşqçilik qabiliyyəti ilə sübut edib.
Bu, heç də şəxsiyyətə pərəstiş deyil, sadəcə, olanı demək və düz olanı dilə gətirməkdir. Abbasovun məşqçilik karyerasına nəzər saldıqda bunu görmək mümkündü. "Zirə"nin futbol akademiyasından başlayan yol heç də hamar olmayıb. Bir müddət akademiyanın aşağı yaş qruplarında çalışan mütəxəssis "qartallar"ın əsas komandasını da çalışdırıb. Ondan sonra "Sumqayıt", ardınca "Turan Tovuz" və hələ ki, son dayanacaq "Şamaxı"...
Abbasov çalışdığı hər klubda iz qoymağı bacarıb desək, yanılmarıq. 2016-cı ildə baş məşqçi kimi "Zirə" ilə yola çıxan Abbasov "Sumqayıt"ı avrokuboklara daşıyan ilk baş məşqçi kimi adını tarixə yazdırdı. 9 ildən sonra elitaya dönən "Turan Tovuz"u sıfırdan qurmaqla bu gün qitəmiqyaslı turnirlərə qatılmaq istəyən komandanın bünövrəsini qoydu. Bir illik fasilədən sonra elitaya qayıdan "Şamaxı"nı mövsümün əvvəlində çoxları zəif gözündə görsə də, "şirlər" bu gün Premyer Liqada əksər klublara başağrı olmağı bacarıb. Onu da nəzərə almaq lazımdı ki, Abbasovun çalışdığı klublar heç də böyük büdcələri, tanınmış, adlı-sanlı legionerləri ilə seçilməyiblər. Və ən əsası işlədiyi hər yerdə gənclərə güvənib, onların üzə çıxmasında rol oynayıb.
Abbasovu xarakteri olan məşqçilər qrupuna da aid etmək olar. Lazım gələndə baş məşqçi kimi sərt üzünü göstərirsə, lazım gələndə incə zarafatla könül almağı da bacarır.
Bu sadaladıqlarım bəs edir, yoxsa davamı gəlsin?! Odur ki, sözüm Abbasovun təyinatına ağız büzüb, narahat olanlaradır. Hər kəs çəkdiyi zəhmətin bəhrəsini görür. Abbasova güvənmək və yeni postunda uğurlar arzulamaq lazımdır.
Elə AFFA rəhbərliyinin 2 tsikllik anlaşmaya imza arması da güvən nümayişidir. Assosiasiyanın bu qərarının arxasından daha bir neçə məqam dayanır. İlk növbədə "Şamaxı"nın U-21-in baza klubu olmasını xüsusi qabartmaq lazımdı. "Şirlər" Premyer Liqada keçirdikləri ilk mövsümdə yerli futbolçulardan yararlanmaqla futbolumuza təkan vermək arzusunu nümayiş etdirmişdi. Bəli, yekunda bunun səhv olduğunu özləri də gördü. Ancaq bu dəfə fərqli olacaq. Axı, ölkənin əksər perspektivli futbolçuları ilə çiyin-çiyinə legionerlər də yer alacaq ki, bu da ümuni işin inkişafına təkan verəcək: istər "Şamaxı" üçün, istərsə də U-21.
Əlbəttə, biz iddia etmirik ki, U-21 qrup qalibi olmaq uğrunda mübarizə aparacaq. Sadəcə, Ayxan bəy autsayder komandalarla ortabab nəticə verməyi bacarığında xüsusi istedada sahibdirsə, gənclər millisində də bunu etmək şansı kifayət qədər yüksəkdi.
