Idman.biz
"Hər mənada rəqabət aparmağa hazıram. Rəqabətdən də çəkinmirəm. Düzü nədirsə, onu da edəcəm".
Bunu "Qarabağ" və Azərbaycan milli komandasının müdafiəçisi Abbas Hüseynov sportal.az-a müsahibəsində deyib.
Həmin müsahibəni təqdim edirik:
– Azərbaycan millisinin tsikldə oyunları başa çatdı. Yığma komanda bir xalla sonuncu pilləni tutdu. Tsikl başlayanda başqa cür olacağını düşünürdünüz?
- Bəli, tsikli 1 xalla başa vurduq. Amma biz vuruşduq, əlimizdən gələni etdik. İnanıram ki, gələcəkdə hər oyuna qələbə üçün çıxacağıq.
– Fernandu Santuşun rəhbərlik etdiyi milli ilə Ayxan Abbasovun baş məşqçisi olduğu komanda arasında hansı fərqlər var idi?
- Fernandu Santuşu pisləsəm, düzgün çıxmaz. Çünki o da millidə baş məşqçim olub. Məni heyətdə oynadıb, şans verib. Amma onu deyə bilərəm ki, biz Ayxan Abbasovu daha yaxşı başa düşürdük və hər mənada daha da yaxşı oyun sərgilədik. Çünki azərbaycanlı futbolçuları tanıyır. Hamı ilə düzgün danışıb, detallı şəkildə izah edirdi.
– Tsiklin son iki görüşündə İslandiya və Fransaya da uduzdunuz. Bu matçlarda nəticə qazanmaq mümkün idi?
- İslandiya ilə matçda real qol şanslarımız oldu. Sadəcə sonluğu gətirmək alınmadı. Çox heyf. Amma biz irəliyə baxmalıyıq. İnanıram ki, hər şey düzələcək. Fransaya qarşı matç isə çətin oldu. Ancaq yenə də əlimizdən gələni etdik. Bilirsiz ki, Fransa millisinin oyunçuları başqa səviyyədədir. Bu, reallıqdır. Lakin istənilən halda, biz də sona qədər vuruşduq.
– Daha çox "Abbas Hüseynov niyə oynayır?" sualları gündəmə gəlmişdi. Sizcə, nəyə görə məhz sizin adınız hallanırdı? Axı millidə əksər futbolçular öz klubunda oynamır…
- Bu barədə fikir bildirmək istəmirəm.
– Ayxan Abbasovun millidəki postunda qalmaq ehtimalı haqda nə deyə bilərsiniz? Onun rəhbərliyi altında milli komandamız Millətlər Liqasında D divizionundan C divizionuna yüksələ biləcək?
- Bəli, məncə D divizionundan C liqasına yüksələ bilərik. Allah qoysa, bunu edəcəyik.
– Daha çox oyun praktikası qazanmaq üçün qışda komandanı dəyişmək istəyirsiniz, yoxsa "Qarabağ"da qalaraq əsas heyət uğrunda rəqabət aparacaqsınız?
- Hər mənada rəqabət aparmağa hazıram. Rəqabətdən də çəkinmirəm. Düzü nədirsə, onu da edəcəm.
– Bildiyim qədərilə "Aris", "Apoel", "Akron" klubları sizi istəyirdi. Həmin klubların təklifindən imtina etdiniz?
- Bəli, belə söhbət var idi. Amma bu haqda çox danışmaq istəmirəm.
– "Qarabağ"ı Çempionlar Liqasının 5-ci turunda "Napoli"yə qarşı oyun gözləyir. Bu matç barədə fikriniz necədir?
- Bu görüş haqda çox yaxşı fikirdəyəm. Kollektivimizə çox inanıram. Neapola uğurlu nəticə üçün gedəcəyik. Əlimizdən gələni edəcəyik ki, uğurlu nəticə qazanaq.
