İdman.biz
Avropa Liqasında "Bodo Qlimt"in qonağı olacaq "Qarabağ" qitə miqyaslı turnirlərdə 70-ci qələbəsini qazana bilər.
İdman.biz xəbər verir ki, Ağdam klubu Liqa mərhələsinin IV turunun matçına qədər 69 dəfə qalib gəlib.
Azərbaycanın ən titullu klubu keçirdiyi 185 matçda buna nail olub. Təmsilçimizin Avropadakı qələbə faizi 37,3-ə bərabərdir.
"Qarabağ" Çempionlar Liqasında 24, Avropa Liqasında 36, Konfrans Liqasında 8, İntertoto kubokunda 1 dəfə qələbə əldə edib. Ağdamlıların qalib gəlmədiyi yeganə turnir Kuboklar kubokudur.
Qələbə sayında Azərbaycan rekordçusu olan "Qarabağ" 70-ə çatmaq üçün bu gün Norveçdə "Bodo Qlimt"i məğlub etməlidir. Bunadək yubiley uğuru 5 dəfə təxirə salınan Qurban Qurbanovun yetirmələrinin son sevinci Çempionlar Liqasının III təsnifat mərhələsinə təsadüf edib.
Bolqarıstanda "Lüdoqorets"i 7:2 hesabı ilə darmadağın edən "Qarabağ" sonrakı 5 görüşdə uduzub. Çempionlar Liqasının pley-offunda Zaqreb "Dinamo"su (0:3, 0:2), Avropa Liqasının Liqa mərhələsində "Tottenhem" (0:3), "Malmö" (1:2) və "Ayaks"ı (0:3) məğlub etmək mümkün olmayıb.
Qeyd edək ki, avrokuboklarda 1996-cı ildə debüt edən "Qarabağ" ilk qələbəsini üç il sonra İntertoto kubokunun Hayfa "Makkabi"si ilə səfər görüşündə qazanıb – 2:1.
Vüqar Xeyrullayev
İdman.biz
