İdman.biz
Millətlər Liqasının İsveçə 0:6 hesablı məğlubiyyətlə bitən 2024/25 mövsümü Azərbaycan yığması üçün fiasko ilə nəticələnib.
İdman.biz xəbər verir ki, 4-cü dəfə təşkil olunan yarışın C liqasında çıxış edən millimiz 1-ci qrupda sonuncu yeri tutub.
D liqasına yuvarlanan komanda turnirdəki antirkordlarına imza atıb. Fernandu Santuşun yetirmələri az qala hər göstəricidə ən pis nəticəsini yaşayıb.
Qrup sonuncusu – yığmamız ilk dəfə Millətlər Liqasında qrupda sonuncu yeri tutmaqla aşağı dəstəyə düşüb.
Qələbəsiz – millimiz ilk dəfə turnirin qrupunda qələbə qazanmayıb.
5 məğlubiyyət – yığmamız keçirdiyi 6 oyunun beşində uduzmaqla antirekorda üzülüb.
17 buraxılan top – əvvəlki üç mövsümün 18 matçında ümumilikdə 14 qol buraxan millimiz bu dəfə qrupda topu 17 dəfə qapısından çıxarıb.
1 xal – bunadək ən pis halda 6 xalı olan yığmamızın yeganə xalı Estoniyada heç-heçə ilə əldə edilib.
Bir addım da aşağı – Millətlər Liqasının ümumi sıralamasında 47-ci olan yığmamız 6 il əvvəlki antirekordunu bir addım da pisləşdirib.
Yeganə təsəlli – 6 antirekord yeniləyən millimizin ən uğursuz olmayan yeganə göstəricisi vurulan qol sayında olub ki, bu da 4 il əvvəl cəmi 2 dəfə fərqlənməsi ilə bağlıdır.
| mövsüm | liqada yer | O | Q | H | M | T/F | X | yekun yer |
| 2018/19 | D-2 | 6 | 2 | 3 | 1 | 7-6 | 7 | 46 |
| 2020/21 | C-3 | 6 | 1 | 3 | 2 | 2-4 | 6 | 43 |
| 2022/23 | C-2 | 6 | 3 | 1 | 2 | 7-4 | 10 | 38 |
| 2024/25 | C-4 | 6 | 0 | 1 | 5 | 3-17 | 1 | 47 |
Vüqar Xeyrullayev
İdman.biz
