İdman.biz
"Zirə"nin Konfrans Liqasının pley-offundakı rəqibi "Omoniya" Kiprin 21 qat çempionudur.
İdman.biz xəbər verir ki, avrokuboklarda 171 oyunda 61 dəfə qalib gəlib, 78 dəfə uduzan Nikosiya klubunun top fərqi 226-273-dür.
Hazırda iştirak etdiyi Konfrans Liqasında klubun 14 görüşdə 7 qələbəsi, 3 məğlubiyyəti var. Top fərqi 22-20-dir.
2021/2022-ci illər mövsümündə Çempionlar Liqasının II təsnifat mərhələsində "Qarabağ"ın indiki rəqibi Zaqreb "Dinamo"suna uduzan (0:2, 0:1) "Omoniya", Avropa Liqasının pley-offunda Belçika "Antverpen"inə penaltilər seriyasında (4:2, 0:2, p.2:3) yenilərək Konfrans Liqasında Ağdam təmsilçisi ilə eyni qrupa düşüb. Azərbaycan çempionunundan 1 xal alan (2:2, 1:4) Nikosiya klubu digər matçlarda 3 heç-heçə qarşılığında 1 məğlubiyyətə üzülüb.
Ötən mövsüm bu turnirdə "Qəbələ" üzərində qələbələrin (3:2, 4:1) ardından Danimarka "Mityullann"ı tərəfindən (1:0, 1:5) pley-offa yolu kəsilən Kipr klubu, cari mövsümdə eyni yarışda 4 görüşünün hamısında qalıb gəlib. Komanda Kutaisi "Torpedo"sunu (3:1, 2:1) və macar "Fehervar"ını (1:0, 2:0) yolundan kənarlaşdırıb.
Avropa Liqasında 2 dəfə qrupda oynayan (2020/2021, 2022/2023) "Omoniya"nın qitə yarışlarında ən böyük uğuru uzaq 70-80-ci illərdə 4 dəfə Çempionlar Kubokunun 1/8 finalında oynamasıdır. Ancaq həmin mərhələdəki 8 matçında da klub 1 qələbə qarşılığında 7 məğlubiyyət alaraq, rəqiblərinin 32 qolundan 6-na cavab verib.
Ölkə çempionatında klubun son zəfəri 2021-ci ildə olub. Ötən il klub bürünc medal qazanıb. Son ölkə çempionatında rəqib qapılarına 36 oyunda 62 dəfə yol tapan nikosiyalılar orta hesabla hər oyunda qapıya 11,7 zərbə endiriblər.
Orta hesabla 49,1 % topa sahib olmaya malik "Omoniya"nın ötürmələrinin 82 %-i dəqiq olub. Uzun ötürmələrin 55 %-i hədəfə çatıb.
Nikosiyalı futbolçular təkbətək mübarizələrin 36,6, hava mübarizəsinin 43,7 %-də üstün olublar.
Hər oyuna orta hesabla 1,3 dəfə offsayda düşən futbolçular 11,9 dəfə fol ediblər.
Müdafiədə hər oyuna orta topalma 42,8, qapıçı seyvi 2,7-dir.
Qeyd edək ki, "Omoniya" Konfrans Liqası pley-offunda "Zirə" ilə avqustun 22-də Nikosiyada, 29-də isə Bakıda qarşılaşacaq.
Vüqar Məmmədov
İdman.biz
