Sport24.az
"İstanbulda UEFA-nın nümayəndəliyinin açılması Türkiyədə baş tutacaq nüfuzlu turnirlərlə əlaqədar tərəflərin əməkdaşlığının tərkib hissəsidir". Sport24.az xəbər verir ki, bu sözləri AFFA-nın icraçı vitse-prezidenti Sərxan Hacıyev UEFA-nın Türkiyədə nümayəndəliyinin fəaliyyətə başlaması ilə əlaqədar təşkil olunan tədbirdə iştirakı ilə bağlı deyib.
Qurum rəsmisi UEFA-nın qardaş ölkədə müxtəlif layihələr həyata keçirəcəyini vurğulayıb:
"Türkiyə Futbol Federasiyası tədbirin yüksək səviyyədə təşkil olunması üçün əlindən gələni etmişdi. Bildiyiniz kimi, 2026-cı ildə UEFA Avropa Liqasının, 2027-ci ildə isə UEFA Konfrans Liqasının final oyunu qardaş ölkədə keçiriləcək. Bundan başqa, 2032-ci ildə Avropa çempionatına Türkiyə və İtaliya birgə ev sahibliyi edəcək. Bu nüfuzlu tədbirlərlə bağlı UEFA ilə Türkiyə arasında sıx əməkdaşlıq işləri görüləcək. Həmçinin regionda futbolun inkişafı ilə bağlı UEFA-nın müxtəlif layihələri olacaq. İstanbul nümayəndəliyinin açılması da bunların tərkib hissəsi idi".
S.Hacıyev tədbirdə UEFA, həmçinin Türkiyə prezidenti ilə yanaşı, bir sıra ölkələrin Futbol Federasiyalarının rəhbərlərinin iştirak etdiyini söyləyib:
"Türkiyə Prezidenti Rəcəb Tayyib Ərdoğan nümayəndəliyin açılış mərasimində iştirak etdi. O, öz xeyir-duasını verdi, nümayəndəliyə fəaliyyətində uğurlar arzuladı. Həmçinin tədbirdə UEFA prezidenti Aleksander Çeferin və bir sıra Avropa və Asiya Futbol Federasiyalarının rəhbərləri iştirak etdi". (Report)
