16 mövsümlük səyahətin sonu: 7 mükafat qazanan oyunçu ilə vida

Azərbaycan çempionatının I Liqasını tərk etdiyi XXVI turda rəsmiləşən "Qaradağ Lökbatan" aşağı dəstənin ən təcrübəli klublarından biridir.

İdman.biz xəbər verir ki, Bakı klubu ardıcıl 16 mövsüm I Liqada çıxış edib.

Paytaxt təmsilçisi 2009/10 mövsümündə "Neftçi" İSM adı ilə qatıldığı yarışda 2 ildən sonra "Qaradağ Lökbatan"a çevrilib. Komanda həm də aşağı dəstənin ən uğurlu iştirakçılarıdan biri idi.

Ötən il son turlara qədər çempionluq uğrunda mübarizə aparan və Premyer Liqaya vəsiqəni "Şamaxı" ilə mübarizədə əldən verən "Qaradağ Lökbatan" 7 dəfə mükafatçılar sırasında yer alıb. Bakı klubu 2011/12 və 2021/22 mövsümlərində çempion olsa da Premyer Liqa üçün lisenziya ala bilməyib.

2012/13, 2015/16, 2017/18 və 2023/24 mövsümlərində I Liqada 2-ci yeri tutan komanda 2013/14 mövsümündə 3-cü yerlə kifayətlənib. "Qaradağ Lökbatan" indiki kimi 2019/20 mövsümündə də sonuncu yeri tutub. Amma 13 komandalı çempionat həm koronavirus pandemiyasına görə yarımçıq qalıb, həm də ikinci dəstə olmadığı üçün aşağı yuvarlanmaq qaydası işləməyib.

Qeyd edək ki, dünən səfərdə "Karvan"la 2:2 hesablı heç-heçə edən Bakı klubu sona bir tur qalmış sonuncu yeri rəsmiləşdirib. 23 xala malik "Qaradağ Lökbatan" "Difai" və "Cəbrayıl"dan 3 xal geri qalır. Xallar eyni olduqda qələbə sayı əsas götürüldüyü üçün paytaxt təmsilçisi digər iki komandadan hər hansı birini keçmək şansını itirib.

İdman.biz