İdman.biz
UEFA Millətlər Liqasının ilk turunda Bakıda İsveç yığması ilə oyunda qapısında 3 qol görən Azərbaycan millisi bununla bir sıra ilklərə imza atmış olub.
İdman.biz seçməmizin 1:3-lük ev məğlubiyyətinin millinin tarixində yerinə nəzər salıb.
Komandamız Millətlər liqasında ilk dəfə ev oyununda qapısında 2-dən artıq qol görüb. Hətta Bakıda 2 qolu belə buna qədərki 9 rəqibimizdən yalnız Lüksemburq yığması 2020-ci ilin eyni tarixində - sentyabrın 5-də vura bilib.
Komandamız Millətlər Liqasında ilk dəfə evdə 1 topdan artıq fərqlə məğlub olub. Bu yarışda səfər oyunlarını belə nəzərə alsaq, komandamız C Liqasında iştirakı çərçivəsində ilk dəfə qapsında 2-dən artıq qol görüb. Yalnız bir dəfə D Liqasında - 2018-ci il noyabrın 20-də komandamız səfərdə Kosovaya 0:4 hesabı ilə uduzub.
Bütün turnirlərdə rəsmi oyunlarını, eləcə də yoldaşlıq görüşlərini nəzərə almaqla, komandamız 13 oyun idi ki, evdə nə qapısında 2-dən artıq top görüb, nə də 1 topdan artıq fərqlə uduzmayıb. Bu hadisələr sonuncu dəfə Bakıda 2021-ci il noyabrın 11-də dünya çempionatı seçmələrində Lüksemburqla oyunda yaşanıb (1:3).
Qeyd edək ki, Lüksemburqla qarşılaşmadan sonra rəsmi oyunlarda Bakıda qapımıza 1-dən artıq top vuran da olmamışdı.
Vüqar Məmmədov
İdman.biz
