Idman.biz
Keçmiş NASCAR pilotu Qreq Biffl, həyat yoldaşı Kristina, qızı Emma və oğlu Rayder Şimali Karolina ştatının Steytsvill hava limanında şəxsi Cessna C550 təyyarəsinin qəzaya uğraması nəticəsində həlak olublar.
İdman.Biz xəbər verir ki, keçmiş avtomobil yarışçısı Kenni Uollesin sözlərinə görə, Kreyq Uodsvort da təyyarədə olub. Təyyarədə ümumilikdə altı nəfər olub və sağ qalan olmayıb.
Göyərtə nömrəsi N257BW olan təyyarə Biffl ilə əlaqəli GB Aviation Leasing MMC şirkətinə məxsus imiş. AccuWeather-in məlumatına görə, qəza zamanı hava limanı ərazisində əlverişsiz hava şəraiti, o cümlədən alçaq buludlar, güclü çiskin və dörd kilometrdən az görünüş məsafəsi mövcud olub.
Aeroport növbəti xəbərdarlığa qədər bağlanıb. Federal Mülki Aviasiya Administrasiyası (FAA) və yerli hakimiyyət orqanları araşdırma aparır. Qəzanın səbəbi hələ müəyyən edilməyib.
Qreq Biffl 19 Kubok Seriyası qələbəsi ilə NASCAR Busch Series (2002) və Craftsman Truck Series (2000) çempionudur. 2023-cü ildə o, NASCAR-ın 75 ən böyük sürücüsündən biri seçilib. Son illərdə o, 2024-cü ildə baş verən Helena qasırğasının qurbanlarına kömək edərək xeyriyyə işlərində fəal iştirak edib.
