Report.az
Portuqaliyanın Palmela şəhərində keçirilən kartinq üzrə beynəlxalq "Easykart Portugal Trophy" turnirində qalib olan azərbaycanlı pilot Davin Cəfərov "Report"a müsahibə verib. 15 yaşlı idmançı qələbə təəssüratını bölüşüb və "Formula 4" yarışına dəvət almasından danışıb. O, gələcəkdə avtomobil yarışları üzrə dünya çempionatlarında Azərbaycanı layiqincə təmsil etmək istədiyini söyləyib.
- Portuqaliyada keçirilən "Easykart Portugal Trophy" beynəlxalq yarışında birinci yeri tutdunuz. Təəssüratınız necədir?
- Bəli, Portuqaliyada keçirilən Palmela Beynəlxalq trek yarışında Tag Livre kateqoriyasında qalib gəldim və Portuqaliya Kubokunu qazandım. Bu, mənim üçün unudulmaz an oldu. Çünki nəinki podiumda birinci yeri tutdum, həm də bütün iştirakçılar arasında ən sürətli pilot oldum. Fəxri kürsüdə Azərbaycan bayrağını qaldırmaq məni hədsiz qürurlandırdı. Bu, şəxsi qələbədən daha çox idi - ölkəmi beynəlxalq yarışda təmsil etmək anı idi.
- Gənc yaşda belə yarışda birinci yeri tutmaq necə hissdir?
- Bu inanılmaz bir hissdir. Motorsport son dərəcə rəqabətlidir və bu səviyyədə birinci olmaq mənə həm inam, həm də motivasiya verir. Gənc yaşda belə qələbələr göstərir ki, zəhmət və fədakarlıq həqiqətən öz bəhrəsini verir. Amma daha da önəmlisi, bu, mənə məsuliyyət hissi verir – təkmilləşməyə davam etmək, limitlərimi aşmağa davam etmək və daxil olduğum hər yarışda ölkəmi şərəflə təmsil etməyə davam etmək. Hazırda əqli, fiziki möhkəmliyimi inkişaf etdirmək və podiumlar uğrunda mübarizə aparmaq üçün lazım olan təcrübə qazanmağa davam edirəm. Bu, avtoidmanda uzunmüddətli karyera üçün möhkəm zəmin yaradır.
- Gələcəkdə Azərbaycanı təmsil edəcəyiniz başqa yarışlar var?
Bəli, var. Bu il daha üç böyük yarış olacaq. Ən vacibi isə İtaliyada keçiriləcək Dünya Qran Finalı olacaq və burada dünyanın hər yerindən ən yaxşı pilotlar, Avropa və dünya çempionları mübarizə aparacaq. Yarışa qatılmaq üçün Portuqaliyadan X30 kateqoriyasında lisenziya yalnız mənə verilib. Bu hadisə mənim üçün böyük bir mərhələdir. Bütün diqqətimi ən yaxşı performansımı sərgiləməyə və belə bir qlobal platformada Azərbaycan avtoidmanının gücünü göstərməyə yönəltmişəm. Motorsport beynəlxalq idman növüdür və ölkəmin bayrağını daşımaq mənə dərin qürur və məsuliyyət hissi verir. Göstərmək istəyirəm ki, Azərbaycandan olan sürücülər ən yüksək səviyyədə yarışa bilirlər.
- Çoxları kartinqin asan olduğunu düşünür. Bununla bağlı ətraflı məlumat verə bilərsiniz?
- Kartinq çox vaxt tamaşaçılara asan görünür. Lakin bu, indiyə qədər məşğul olduğum ən çətin idman növlərindən biridir. Kartinq inanılmaz fiziki güc, dəqiqlik və zehni diqqət tələb edir. Hər dövrədə saniyəlik qərar vermə, mükəmməl texnika və amansız konsentrasiya lazım olur. Bildiyiniz kimi, belə yarışlarda tez-tez ağır qəzalar baş verir. Qoruyucusuz və kəmərsiz 145-ə qədər sürətlə kartı müxtəlif hava şəraitində idarə etmək həqiqətən də çox çətindir və böyük məsuliyyət tələb edir.
- "Formula 4"dən təklif aldığınız doğrudur?
- Bəli, doğrudur. Almaniyada "Formula 4" komandasından təklif almışam. Bu fürsət performansım nəzərə çarpdıqdan sonra və həmçinin hazırkı komandam "BirelART"ın güclü tövsiyələri sayəsində yarandı. Hazırda kommersiya müzakirələri davam edir və ümid edirəm ki, hər şey tezliklə yekunlaşacaq. Maraqlı addım olacaq. Çünki "Formula 4" "Formula 1"ə gedən yolda ilk rəsmi addımdır.
- "Formula 4"də iştirak gələcəkdə "Formula 1"ə qatılmaq üçün tramplin rolunu oynaya bilər?
- Əlbəttə. Ən böyük arzum və əsas məqsədim "Formula 1"ə çatmaq və Azərbaycanı dünya treklərinda qürurla təmsil etməkdir. Ölkəmizdə idman çox inkişaf edib. Beynalxalq arenalarda hər zaman Azərbaycan idmançıları yüksək nailliyətlər qazanırlar. Biz sözümüzü avtoidmanda da deyə bilirik. "Formula 4" bu səyahətin başlanğıcıdır. Dəstək olarsa, əminəm ki, Azərbaycanın beynəlxalq miqyasda "Formula" yarışlarında və bir gün "Formula 1"in ən yüksək səviyyəsində təmsil olunduğunu görəcəyik. Bu işi görən ilk azərbaycanlı olmaq arzusundayam.
