Rəşad Rəsullu: Balabəy Ağayevin yarımfinal görüşü ilə bağlı başqa istiqamətdə iş aparılacaq

Azərbaycan cüdoçusu Balabəy Ağayevin yarımfinal görüşü barəsində addım atılacaq.

"Report"un Gürcüstana ezam olunan əməkdaşı xəbər verir ki, bunu Azərbaycan Cüdo Federasiyasının icraçı vitse-prezidenti Rəşad Rəsullu jurnalistlərə açıqlayıb.

O, Tibilisidə keçirilən Avropa çempionatında milli üzvlərinin çıxışlarını dəyərləndirib:

"Qızıl medal gözləyirdim. Əgər olmayıbsa, idmançılar öz səhvlərini müəyyənləşdirməlidirlər.

60 və 66 kq çəkidə çıxış edən idmançılar özlərini yaxşı tərəfdən göstərdilər. Demək olar ki, bir səhvə yol verdilər, bu da nəticəyə təsir etdi. Turan Bayramovun bürünc medal qazanması məni çox sevindirdi. Çünki o, 60 kq-dan 66 kq-a keçid etdi və bu keçiddən dərhal sonra bürünc medal qazanmağı bacardı. Bu da o deməkdir ki, idmançılar vaxtında çəkisini dəyişəndə xeyirli olur".

Rəşad Rəsullu 60 kq çəki dərəcəsində çıxış edən Balabəy Ağayevin yarımfinalda məğlub olması barədə danışıb:

"Balabəyin yarımfinaldakı görüşü barədə fikirlər müxtəlifdir. Bu barədə mütəxəssislərə soruşsanız onlar cavab verə bilər. Nəticə dəyişməyəcəyi üçün hazırda heç kimə müraciət etmədik, lakin bu o demək deyil ki, səssiz qalacağıq. Sözügedən məsələ üzərində başqa istiqamətdə işləyəcəyik. Deyə bilərəm ki, Balabəy Ağayev həqiqətən çox yaxşı formada idi".

Qeyd edək ki, Azərbaycan təmsilçilərindən yarışın ilk günündə Əhməd Yusifov (60 kq) və Turan Bayramov (66 kq) bürünc medal qazanıblar.