Report.az
İspaniyanın Las-Palmas-de-Qran-Kanariya şəhərində keçirilən yeniyetmələr arasında Avropa çempionatında qızıl medal qazanan Azərbaycan cüdoçusu Zəhra Quliyeva məşqçilərinə verdiyi sözü tutub.
İdmançı bu barədə "Report"a açıqlamasında bildirib.
40 kq çəki dərəcəsində çempion olan cüdoçu yarışla bağlı təəssüratlarını bölüşüb:
"Bu turnirdə qızıl medal qazandığım üçün çox sevincliyəm. Berlində keçirilən Avropa Kubokunda ilk qarşılaşmada məğlub oldum. Ondan sonra şəxsi müəllimimə və millinin məşqçilərinə söz vermişdim ki, mənə bir daha şans verin və özümü doğruldacağam. Ondan sonra Polşada baş tutan Avropa Kubokunda ikinci yeri tutdum. Avropa çempionatında isə qızıl medal əldə etdim. Məşqçilərə verdiyim sözü tutduğum üçün çox sevinirəm".
Z.Quliyeva yarışa yollanmamışdan əvvəl hədəfinin çempionluq olduğunu söyləyib:
"Qarşıma yalnız bir məqsəd qoymuşdum. Turnirə də yaxşı hazırlaşmışdıq. Təlim-məşq toplanışları keçmişdik. Bu medalı ailəmə, şəxsi müəllimimə və milli komandanın məşqçilərinə həsr edirəm".
Xatırladaq ki, Azərbaycanın yeniyetmə cüdoçuları İspaniyadakı yarışın ilk günündə 2 qızıl, 1 gümüş və 2 bürünc medal qazanıblar.
