Report.az
Portuqaliyanın Koimbra şəhərində keçirilən Dünya Kubokunda qızıl medal qazanan Azərbaycan tamblinqçisi Mixail Malkin qarşısına qoyduğu məqsədə çatmağı bacarıb.
İdmançı bu barədə "Report"a açıqlama verib.
O, sözügedən yarışda birinci yeri tutması ilə bağlı fikirlərini bölüşüb:
"Dünya Kubokunda qızıl medal qazandığım üçün çox sevinirəm. Qarşıma qoyduğum məqsədə çatmağı bacardım. Hədəfim 4 elementi yerinə yetirmək idi və bunu uğurla etdim. Həmçinin dünyada indiyədək heç kimin etmədiyi çətin bir kombinasiyanı da ilk dəfə icra etdim".
M.Malkin qarşıdakı hədəflərindən də söz açıb:
"Bu il dünya çempionatına da qatılacağam. Hədəfim həmin yarışda da uğurlu çıxış etməkdir. Ölkəmizə daha bir medal qazandırmaq niyyətindəyəm".
Xatırladaq ki, Mixail Malkin 32.300 xalla bütün rəqiblərini geridə qoyaraq qızıl medala sahib çıxıb. O, həmçinin Dünya Kuboku seriyasının qalibi olub. İdmançı mövsüm ərzində keçirilən Dünya Kuboku yarışlarında nümayiş etdirdiyi yüksək və stabil nəticələr sayəsində bu uğura imza atıb.
