Report.az
Beynəlxalq Olimpiya Komitəsinin (BOK) Rusiya komandalarına müxtəlif idman tədbirlərində iştirak etməyə icazə verməsinə baxmayaraq, Avropa Futbol Federasiyaları Assosiasiyası (UEFA) bu ölkənin milli komandasının beynəlxalq yarışlara qayıtmasına mane ola bilər.
"Report"un məlumatına görə, bu barədə "The Guardian" Avropanın bir neçə ölkəsinin futbol assosiasiyalarındakı mənbələrə istinadən yazıb.
"Rusiyanın Avropa futboluna və nəticə etibarilə Dünya Kubokuna geri qayıtması üçün real perspektiv yoxdur, çünki bu, FİFA turniri olsa da, Avropa ölkələri üçün seçmə mərhələ UEFA tərəfindən idarə olunur", - nəşr qeyd edir.
Nəşrin məlumatına görə, bir çox Avropa assosiasiyaları, xüsusən də İngiltərə, Almaniya və Fransa assosiasiyaları Rusiya idmançılarının qayıtmasına qarşı çıxırlar.
"The Guardian" xatırlayır ki, UEFA prezidenti Aleksandr Çeferin 2027-ci ildə yenidən seçkilərə qatılmaq niyyətindədir və bu da onun potensial seçicilərinin istəklərinə qarşı çıxmasını ehtimal etmir.
Xatırladaq ki, BOK Rusiya Olimpiya Komitəsinin (ROK) təşkilatdakı üzvlüyünü müvəqqəti bərpa etmək qərarına gəlib.
