Report.az
Braziliya millisinin tarixində ən yaxşı bombardir olan Neymar 980 günlük fasilədən sonra yenidən milli komandanın formasını geyinib.
"Report" xəbər verir ki, 34 yaşlı hücumçu DÇ-2026-nın qrup mərhələsinin III turunda Şotlandiyaya qarşı keçirilən oyunun 76-cı dəqiqəsində meydana daxil olub.
O, baldır əzələsindən aldığı zədə səbəbindən turnirdə komandasının ilk iki matçını buraxmışdı.
Neymarın Braziliya millisindəki əvvəlki oyunu 2023-cü il oktyabrın 18-nə təsadüf edib. Təcrübəli futbolçu milli komandanın heyətində Olimpiya çempionu olub, həmçinin Olimpiya Oyunlarının gümüş medalını qazanıb, Konfederasiyalar Kubokunun qalibi adını əldə edib və Amerika Kubokunun finalında mübarizə aparıb.
79 qolla Braziliya millisinin tarixində ən çox qol vuran futbolçu olan Neymar Şotlandiya ilə görüşdə yığmanın heyətində 129-cu matçına çıxıb.
Zədələr Neymarı iştirak etdiyi bütün dünya çempionatlarında müşayiət edib. O, 2022-ci ildə Serbiya ilə qrup oyunu zamanı zədələnmişdi. 2018-ci ildə Rusiyada keçirilən mundiala isə sağ ayaq pəncəsindən aldığı ağır zədədən sonra qatılmışdı. Futbolçu üç aylıq bərpa prosesindən keçsə də, lazımi fiziki formanı toplaya bilməmişdi.
2014-cü ildə Braziliyada təşkil olunan dünya çempionatında isə Neymar bel nahiyəsindən ciddi zədə almış və buna görə Almaniyaya qarşı yarımfinal görüşünü buraxmışdı. Həmin oyunda Braziliya millisi 1:7 hesabı ilə məğlub olmuşdu.
