Xetaq Qazyumov: "Son saniyədək mübarizə aparsaq, nəticə əldə olunacaq"

"Bizim məşqçi heyətində hamı maksimum nəticə qazanaq üçün çalışır".

İdman.biz xəbər verir ki, bunu sərbəst güləş üzrə Azərbaycan yığmasının baş məşqçisi Xetaq Qazyumov deyib.

O, Paris-2024 Olimpiadasında sərbəst güləşçilərin qazandıqları ilk medalı şərh edib: "Məşqçilər heyətində Olimpiya, dünya və Avropa çempionları yer alıb. Uşaqların yüksək səviyyədə hazırlığı üçün maksimum imkanlardan istifadə etmişik. Bundan sonra hər şey güləşçilərin xalçadakı bacarığından asılı idi. Daha yaxşı nəticələrə ümid edirdik. Amma hazırda bizim cəmi bürüncümüz var. Georginin medal uğrunda görüşü çətin keçdi. Rəqib güclü olsa da, o, Olimpiya mükafatına yiyələndi".

Xetaq Qazyumov sabah Maqomedxan Maqomedovdan da medal gözlədiyini bildirib: "Maqomedxandan də medal gözləyirəm. O, finala vəsiqə qazanmalı idi. Taktiki cəhətdən düzgün işləməmək və ya rəqibin daha çox qələbə qazanmaq arzusu onu həlledici görüşdən kənarda qoydu. Ümid edirəm ki, Maqomed sabah medal qazanacaq. Güləş Azərbaycanda populyar idman növüdür. Gələcəkdə daha böyük uğurlar qazanmağa çalışacağıq. Az əvvələ qədər Azərbaycan yığmasının üzvü olan biri və yığmasnın hazırki baş məşqçisi kimi deyə bilərəm ki, güləşçilər xalçada maksimumu artaya qoymalıdırlar. Onlardan daha bunu tələb edirəm. Son saniyədək mübarizə aparsaq, nəticə əldə olunacaq".

Qeyd edək ki, Azərbaycan sərbəst güləşçiləri Paris-2024 Yay Olimpiya Oyunlarında ilk medalı qazanıblar.

İdman.biz