İdman.biz
"Parisdə Paralimpiya Oyunlarında qızıl medal qazandım. İkinci dəfə Paralimpiya Oyunlarında iştirak edirdim".
İdman.biz xəbər verir ki, bunu Paris-2024 Paralimpiadasında T12 kateqoriyasında uzunluğa tullanma üzrə yarışda Paralimpiya çempionu olan Səid Nəcəfzadə deyib.
Nəcəfzadə Fransa paytaxtına dünya çempionu kimi gəldiyini bildirib: "Üç il əvvəl Tokio-2020-də bürünc medal qazanmışdım. Bu, məni Parisdə keçirilən Paralimpiya Oyunlarına daha da yaxşı hazırlaşmağa sövq etdi. Çox çalışmışdıq. Bura gəlməzdən əvvəl dünya çempionu olmuşdum. Bu da məni favoritlər arasında göstərirdi. Bunun üçün də daha çox həyəcanlı idim. Çox şükür ki, bacardım, qızıl medalı əldə etdim. Sosial şəbəkələrdə və hər yerdə xalqımın dəstəyini gördüm. Cənab Prezident İlham Əliyevə və birinci vitse-prezident Mehriban Əliyevaya idmana və paralimpiyaya diqqətinə görə minnətdarlığımı bildirmək istəyirəm. Dəstəyinə görə məşqçimə, üzvü olduğum "Neftçi" İdman Klubuna, Milli Paralimpiya Komitəsinə və rəhbərliyinə, Gənclər və İdman Nazirliyinə bu yolda bizə dəstək olduğu üçün təşəkkür edirəm".
Qeyd edək ki, Azərbaycan yığması Paris-2024 Yay Paralimpiya Oyunlarında 2 qızıl, 1 gümüş və 1 bürünc medal qazanıb.
İdman.biz
