İdman.biz
"19 yaşında Paralimpiya Oyunlarında bürünc medal qazanmaq çox qürurverici hissdir".
İdman.biz xəbər verir ki, bunu Paris-2024 Yay Paralimpiya Oyunlarında bürünc medal qazanan parataekvondoçu Sabir Zeynalov (K44 kateqoriyası) deyib.
58 kq-da fəxri kürsüyə yüksəlməklə tarixi ilki rəsmiləşdirən paralimpiyaçı bildirib ki, növbəti yarışda bunu qızıla dəyişmək üçün mübarizə aparacaq: "Məqsədim Vətənə çempion olaraq qayıtmaq idi. Amma müəyyən səhvlərimə görə qızıl medalı əldən verdim. Buna baxmayaraq, üçüncü yer uğrunda tailandlı rəqibimi məğlub etməyi bacardım. Yeni hədəflərim var. Dünya və Avropa çempionu olmaq, həmçinin Los-Anceles-2028 Paralimpiadasında qızıl medal qazanmaq istəyirəm. Dəstəyinə və diqqətinə görə cənab prezidentimiz İlham Əliyevə, birinci vitse-prezidentimiz Mehriban Əliyevaya, Gənclər və İdman Nazirliyinə, Milli Paralimpiya Komitəsinə, Azərbaycan Taekvondo Federasiyası və Əmək və Əhalinin Sosial Müdafiəsi Nazirliyinə öz təşəkkürümü bildirirəm".
İdman.biz
