İdman.biz
Azərbaycan millisinin Paris-2024 Yay Paralimpiya Oyunlarındakı nümayəndə heyətinin rəhbəri Rüfət Hacılının İdman.biz saytına müsahibəsi
- Paris-2024 Yay Paralimpiya Oyunlarına sayılı günlər qalıb. Son durumu necə qiymətləndirirsiz?
- Hamı kimi biz də mötəbər yarışın başlamasını səbrsizliklə gözləyirik. Əminəm ki, paralimpiyaçılarımız əvvəlki Yay Paralimpiya Oyunlarında olduğu kimi, yenə medallar uğrunda əzmkarlıqla mübarizə aparacaqlar. Daim ölkə başçısı cənab İlham Əliyevin yüksək diqqət və qayğısı ilə əhatə olunan paralimpiyaçılarımızın əsas məqsədi dördilliyin ən mötəbər yarışı uğurlu çıxışdır. Heyətdə Paralimpiya çempionları İlham Zəkiyev, Dürsədəf Kərimova, Raman Salei, Oloxan Musayev, Orxan Aslanov və Lamiyə Vəliyeva kimi titullu paralimpiyaçılarımız yer alıb. Komandamızın hər bir üzvünə inanırıq. Paralimpiyaçılarımız Paris-2024-ə əzmlə hazırlaşırlar. Bildiyiniz kimi, Olimpiya Oyunlarında medal qazanan idmançılarımız ötən həftə cənab Prezident İlham Əliyev tərəfindən qəbul edilərək təltif olunublar. Bu, bir daha dövlət başçısının idmana olan diqqətini göstərir.
- Lisenziya qazanan paralimpiyaçılarımızın bir qrupu artıq Fransadadır.
- Bəli, Fransa tərəfindən təklif olunan Ajan şəhərindəki Təlim-Məşq Mərkəzinə baxış keçirilərək paratletika, paraüzgüçülük, paragüllə atıcılığı və parakamandan oxatma üzrə milli komandamızın üzvlərinin Paralimpiadaya hazırlığı burada davam etdirilməsi qərara alınıb. Eyni zamanda, paracüdoçularımızla parataekvondoçularımız üçün müvafiq olaraq, Zaqatala və Qubada təlim-məşq toplanışı təşkil edilib.
- Komandamıza dəstək üçün hansı atılıb? Fransadakı səfirliyimiz və diasporamızla hansı tədbirlər nəzərdə tutulub?
- İnanıram ki, Fransada yaşayan soydaşlarımız paralimpiyaçılarımız yalnız buraxmayacaqlar. Təmsilçilərimizin dəstəksiz qalmaması üçün komitə tərəfindən müvafiq işlər görülüb. Bununla bağlı Diasporla İş üzrə Dövlət Komitəsinə müraciət edilib, idmançılarımızın yarış cədvəli və məkanları haqqında məlumat göndərilib. Bundan əlavə, Bakıdan Parisə gedən nümayəndə heyəti paralimpiyaçılarımızı dəstəkləyəcək.
- Bəs yarışın ölkəmizdə canlı yayımlanması gündəmdədir?
- Əsas məqsədimiz paralimpiyaçılarımızın mübarizə aparacağı yarışların yayımlanmasıdır. Bu istiqamətdə yerli televiziya kanalları ilə danışıqlar davam edir. Sevindirici haldır ki, çağırışımıza səs verərək Paralimpiadanın yayımında maraqlı olan kanallarımız var. Biz də ilk dəfə olaraq Paralimpiya Oyunlarının yerli telekanalda canlı yayımlanmasını çox istəyirik.
İdman.biz
