İdman.biz
Azərbaycan millisi Paris-2024 Yay Olimpiya Oyunlarında 6-cı medalı qazanıb.
İdman.biz xəbər verir ki, bu uğura Giorgi Meşvildişvili imza atıb.
125 kq çəkidə çıxış edən sərbəst güləşçimiz bürünc medal qazanıb. O, 3-cü yer uğrunda qarşılaşmada qalib gəlib. Bu, hesabında 2 qızıl və 2 gümüş olan millimizin ikinci bürüncü olub.
Onun medalı Olimpiadalar tarixinə Azərbaycan idmançılarının əldə etdiyi 55-ci mükafat kimi düşüb. Debütü Atlanta-1996-da gerçəkləşən yığmamız 8-ci Oyunlarında bu rəqəmə çatıb. 9 qızıl və 16 gümüşü olan millimiz yubiley – 30-cü bürüncü əldə edib.
Bu, sərbəst güləşçilərimizin Parisdə ilk uğuru olub. Ümumilikdə isə onlar 13-cü mükafatı qazanıb: 3 qızıl, 4 gümüş və 6 bürünc.
Ümumilikdə isə güləşçilərimiz Parisdə 2-ci bürüncə sahib çıxıb. Bu, pəhləvanların 27-ci medalıdır: 4 qızıl, 8 gümüş, 15 bürünc.
Qeyd edək ki, Paris-2024-də bunadək cüdoçular Hidayət Heydərovla (73 kq) Zelim Kotsoyev (100 kq) qızıl, taekvondoçu Qaşım Maqomedovla (58 kq) boksçu Alfonso Dominqes (92 kq) gümüş, yunan-Roma güləşçisi Həsrət Cəfərov (67 kq) bürünc medal qazanıb.
Vüqar Xeyrullayev
İdman.biz
